İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 339 Hüküm no: 332 Orijinal metin no: [41b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Ömer’in Meryem bt. Şaban’la iki sene önce evlendiği Mahmiye-i İstanbul’da Sultan Selim Han Câmi‘-i şerîfi kurbünden sâkin işbu râfi‘u’l-kitâb Mustafa b. Ömer mahfil-i kazâda hamal tâifesinden Mehmed b. Ali nâm kimesne mahzarında üzerine da‘vâ ve takrîr-i kelâm edip işbu hâzıra bi’l-meclis olan Meryem bt. Şaban nâm hatun târih-i kitâbdan iki sene mukaddem dört yüz akçe mehr-i müeccel tesmiyesi ile tezevvüc edip zevce-i medhûlün-bihâm iken âhar diyâra gittiğimde mezkûr Mehmed mezbûre Meryemi târih-i kitâbdan altı ay mukaddem tezevvüc etmişdir suâl olunup kasr-ı yed etmek için mezbûra tenbîh olunmak matlûbumdur dedikde gıbbe’s-suâl mezbûr Mehmed cevâbında fi’l-vâki‘ târih-i mezbûrda mezbûre Meryem’i mehr-i müeccel-i ma‘lûm tesmiyesiyle tezevvüc ettiğini ikrâr lâkin müdde‘î-i mezbûr iki sene mukaddem mezbûre Meryem’i tezevvüc ettiğini inkâr edicek müdde‘î-i mezbûrdan müdde‘âsını mübeyyin beyyine taleb olundukda udûl-i Müslimînen olup mahmiye-i mezbûrede Fethiye İmâmı Mahmud Efendi b. Abdullah ve Kırkçeşme kurbünde sâkin Ali Bey b. Mazhar nâm kimesneler li-ecli’ş-şehâde mahfil-i kazâya hâzırân olup istişhâd olunduklarında fi’l-vâki‘ müdde‘î-i mezbûr Mustafa mezkûre Meryem’i târih-i kitâbdan iki sene mukaddem bizim huzûrumuzda dört yüz akçe mehr-i müeccel tesmiyesiyle tezevvüc edip mezbûre Meryem dahi nefsini tezvîc eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Şa‘bâni’l-mu’azzam li-sene isnâ ve seb‘în ve elf. Şuhûdü’l-hâl: Ahmed Efendi b. Hüseyin el-kādî, Veli b. Mahmud, Rasûl b. Rıdvan, Mehmed b. Ramazan, Hüseyin b. Ebûbekir.