İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 340 Hüküm no: 333 Orijinal metin no: [41b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Sofyanos’un altıda bir menzil hissesini Saltana bt. Yani’ye sattığı Mülknâme. Mahmiye-i İstanbul’da Mirahur mahallesinde mütemekkin Yanaki v. Sofyanos nâm zimmî meclis-i şer‘de işbu râfi‘u’l-kitâb Saltana bt. Yani mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Laskari v. Yani mülkü ve bir tarafdan Dimitri v. Todori mülkü ve bir tarafdan Benli v. Ellez mülkü ve bir tarafı tarîk-i âmma müntehî iki bâb ulvî ve bir sofa-i ulviyeyi ve bir hücre-i ulviyeyi ve bir şehnişîni ve bir sofa-i süflâyı ve bir ahur ve bir furun ve bir bi’r-i mâ ve kenîfi ve zât-ı eşcâr-ı muhavvâtayı müştemil altı sehm i‘tibâr olunan menzilin üç sehmi Fero nâm Nasraniyenin mülkü ve üç sehmi dahi benim mülküm olup ilâ-hâze’l-ân iştirâk üzere mutasarrıflar idik el-hâletü hâzihî mülküm olan üç sehm hissemden bir sehm hisse-i şâyi‘amı bi-cümleti‘t-tevâbi‘ ve’l-levâhık ve kâffetü’l-hukūk ve’l-merâfık mezbûre Saltana’ya râyic fi’l-vakt on beş bin akçeye bâtten bey‘ u teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr on beş bin akçeyi tamamen yedinden alıp kabz edip menzil-i mezbûrun altı sehimden bir sehm hissesini keyfe mâ yeşâ mutasarrıfa olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Mehmed Efendi b. Ali, Mehmed Çelebi b. el-müezzin, Muslı Çelebi b. Mehmed el-müezzin Papa Saret v. Papa İbrail, Papa Toros v. Yasef, Verakır Kethudâ v. Kosta, Yanaki v. Aleksandıra, Aslan v. Aydın Kethudâ, Kiryazi v. Yorgi, Asdari v. Adrah.