İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 340 Hüküm no: 334 Orijinal metin no: [41b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Halil’in kardeşi Mustafa ile Bektaş b. Emircan’ın tereke davasında sulh oldukarı Sulh. Mahmiye-i İstanbul’da Debbağzâde mahallesinde sâkine iken bundan akdem vefât eden Fâtıma bt. Halil nâm hatunun verâseti zevc-i metrûku Bektaş b. Emircan ile li-ebeveyn er karındaşları Süleyman ve Mustafa’ya münhasıra olduğu şer‘an zâhir oldukdan sonra mezbûr Mustafa kendi tarafından asâleten ve karındaşı mezbûr Süleyman tarafından husûs-ı câ’i’z-zikr için vekîl olup nehc-i şer‘î ve vech-i mer‘î üzere vekâleti sâbite olmağın meclis-i şer‘-i hatîrde işbu râfi‘u’l-kitâb mezbûr Bektaş mahzarında ikrâr ve takrîr-i kelâm edip kız karındaşım müteveffât-ı mezbûrenin cümle terekesinden dört sehmden iki sehmi zevci mezbûra ve iki sehmi müvekkilim ile bana intikāl etmiş idi el-hâletü hâzihî müvekkilim ile benim hisseme â’id olan iki sehm hissemizden sevâbıkdan ârî tehârüc-i şer‘î tarîki üzere muhallefâtına râfi‘u’l-yed olan zevci mezbûr Bektaş benimle altı bin beş yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûru asâlet ve vekâletim hasebiyle tamamen yedinden alıp kabz eyledim ba‘de’l-yevm husûs-ı mezbûra müte‘allika da‘vâm kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-eimme Mustafa Efendi, el-Hâc Mehmed Beşe b. Mustafa, Usta Mehmed b. ( ), Mustafa b. Mehmed, Mehmed b. Ramazan, Yiğitbaşı Ali Beşe, Fahrü’l-akrân el-Hâc İsmail.