İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 341 Hüküm no: 336 Orijinal metin no: [42a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Meryem bt. Rüstem’in boşandığı kocası Abdülkerim b. Abdurrahman’dan mehrini ve iddet nafakasını tahsil ettiği Mahmiye-i İstanbul’da Altıpoğaça mahallesinde sâkine Meryem bt. Rüstem nâm hatun meclis-i şer‘de zevc-i mutallıkı Abdülkerim b. Abdurrahman mahzarında üzerine da‘vâ edip mezbûr Abdülkerim bundan akdem zevcim olup beni tatlîk etmekle zimmetinde mütekarrir iki bin akçe mehr-i müeccelimin bin akçe ve iki yüz akçe dahi nafaka-i iddet için cem‘an bin iki yüz akçesini alıp bâkī kalan bin akçe mehr-i müeccelimi yedimden ahz u kabz eylediği bir sîm ön kuşak ve on üç arşın Ersekli? bezi ve iki yorgan çarşafı ve bir Yemenî yorgan ve beş sene mukaddem bana küpe alıvermek için yedine teslîm eylediğim iki bin akçeyi mezbûrdan taleb ederim suâl olunsun dedikde gıbbe’s-suâl mezbûr Abdülkerim cevâbında fi’l-vâki‘ mezbûre Meryem bundan akdem iki bin akçe mehr-i müeccel ile zevcesi olduğunu ikrâr lâkin hîn-i tatlîkinde müdde‘iyye-i mezbûreye bin üç yüz akçe nakid ve yedi yüz akçesini dahi zimmetinde hakkım olan yedi yüz akçeye takās ol dahi mukāssa ve kabûl ve beş yüz akçe dahi nafaka-i iddeti için verip cem‘an iki bin beş yüz akçeyi yedine teslîm eyledim deyü def‘le mukābele ve ziyâdesi olup zikirleri sebk eden bir ön sîm kuşak ve on üç arşın Ersekli bezi ve iki yorgan çarşafı ve bir Yemenî yorganı ve küpe alıvermek için yedinden iki bin akçe aldığını inkâr edicek evvelâ müdde‘iyye-i mezbûreden ziyâde-i merkūmeyi mübeyyin beyyine taleb olundukda ityân-ı beyyineden izhâr-ı acz edip istihlâf etmeğin müdde‘iyye-i mezbûreden zikirleri sebk eden eşyâyı ahz u kabz etmediğine mezbûr Abdülkerim’e yemîn teklîf olundukda ol dahi halfü billâhi’l-aliyyü’l-azîm eyledikden sora mezbûr Abdülkerim’den def‘-i mezbûrunu mübeyyin beyyine taleb olundukda udûl-i ricâlden mahmiye-i mezbûrede Mercanağa mahallesinden el-Hâc Hüseyin b. Mustafa ve Sâdık b. Hasan nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Abdülkerim zevcesi müdde‘iyye-i mezbûreyi bundan akdem bizim huzûrumuzda tatlîk eyledikde iki bin akçe mehr-i müeccelinden bin üç yüz akçesini nakid ve yedi yüz akçesini müdde‘iyye-i mezbûre zimmetinde olan yedi yüz akçeye takās ol dahi mukāssa ve kabûl ve beş yüz akçe dahi nafaka-i iddeti için mezbûre Meryem Hatun’a def‘ u teslîm ol dahi yedinden ahz u kabz eyledi biz bu husûsa şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle olmağın mûcebince müdde‘iyye-i mezbûre mu‘ârazada men‘ birle mâ-vaka‘a bi’t-taleb ketb olundu. Fî 5 Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc Ahmed b. Mehmed, Mustafa b. Mehmed, Mehmed b. Ramazan, Mustafa b. İsa, Gazenfer b. Tevekkel.