İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 342 Hüküm no: 337 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan bt. Mehmed’in boşandığı kocası Cankulu b. Mehmed’le zimmetlerini ibra ettikleri İbrâ. Mahmiye-i İstanbul’da Manisalı Çelebi mahallesinde sâkine Sultan bt. Mehmed mahfil-i kazâda zevc-i mutallıkı Cankulu b. Mehmed mahzarında ikrâr ve takrîr-i kelâm edip mezbûr Cankulu zimmetinde mütekarrir ve ma‘kūdün-aleyh olan bin dört yüz akçe mehr-i müeccelim ve nafaka-i iddet-i ma‘lûmem ve me’ûnet-i süknâmı da‘vâ ve taleb eylediğimde beynimizde münâza‘a vâki‘ olmağın vesâtet-i muslihîn ile da‘vâ-yı mezkûremden merkūm Cankulu benimle yedi yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr yedi yüz akçeyi mezbûrun yedinden bi’t-tamam ahz u kabz edip zevciyete ve gayra müte‘allika da‘vâdan her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’t-tâsi‘ min-Ramazani’l-mübârek li-sene isnâ ve seb‘în ve elf. Şuhûdü’l-hâl: Derviş b. Hüseyin, Mehmed b. Musa, Hasan b. Abdullah, Solak Musa, Hüseyin b. Gülistan, Gazenfer b. Tevekkül, Mustafa b. Mecid, Mehmed b. Ramazan.