İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 343 Hüküm no: 338 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Mahmud’un boşandığı kocası Abdullah b. Mehmed’den alacaklarını tahsil ederek zimmetini ibra ettiği İbrâ Mahmiye-i İstanbul’da Kocamustafapaşa mahallesinde sâkine Fâtıma Hatun bt. Mahmud meclis-i şer‘de zevc-i mutallıkı işbu râfi‘u’l-kitâb Abdullah b. Mehmed mazharında ikrâr ve takrîr-i kelâm edip zevc-i mutallıkım mezbûr Abdullah zimmetinde karz-ı şer‘îden yüz kıt‘a riyâlî guruş hakkım vardır deyü bundan akdem mezbûrdan da‘vâ ve taleb eylediğimde ol dahi inkâr ve ben dahi müdde‘âmı isbât sadedinde olmağla beynimizde münâza‘ât-ı kesîre câriye ve sâdıre olmuş idi el-hâletü hâzihî vesâtet-i Müslimîn ve muslihîn ile meblağ-ı mezbûr da‘vâsından müdde‘iyye-i mezbûre Fâtıma benimle on kıt‘a riyâlî guruş üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh-ı mezbûru tamamen yedinden alıp kabz eyledim min-ba‘d meblağ-ı mezbûrun mâ‘adâsından ve târih-i kitâba gelince cemî‘ de‘âvî ve mutâlebâttan zevc-i mutallıkım mezbûr Abdullah’ın zimmetini ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ min-Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc Derviş b. Mehmed er-râcil, Mumcu İsmail Çelebi b. ( ), Mehmed Beşe [b.] Mumcu el-mübâşir, el-Hâc Abdülkerim b. el-müezzin, Hüseyin Çelebi b. Yusuf