İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 344 Hüküm no: 339 Orijinal metin no: [42a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühan bt. Ahmed’in Veli b. Hasan’dan satın aldığı altı yaşlarındaki Rus asıllı cariyeyi Veli Beşe’ye iade ettiği Da‘vâ-yı câriye. Mahmiye-i İstanbul’da esirci tâifesinden Veli b. Hasan nâm kimesne meclis-i şer‘de mahmiye-i mezbûrede Şehremîni kurbünde İskender Ağa mahallesinde sâkine işbu râfi‘u’l-kitâb Ümmühan bt. Ahmed mahzarında üzerine da‘vâ edip bundan akdem mezbûreye silk-i mülkümde olan tahmînen altı yaşında Rusiyyetü’l-asl bir re’s sagīr câriyemi her biri yedişer dirhem gelir kırk beş riyâlî guruşa bey‘-ı bâtt-ı sahîh ile bey‘ u teslîm ol dahi yedimden kabz ve tesellüm eylemiş idi suâl olunup semen-i mezbûru alıvermek taleb ederim dedikde gıbbe’s-suâl mezbûre Ümmühan cevâbında fi’l-vâki‘ müdde‘î-i mezbûrdan bi-tarîkı’l-müsâveme semen-i mezbûre bir re’s tahmînen altı yaşında Rusiyyetü’l-asl câriyesini ahz edip ba‘dehû yine kendüye huzûr-ı Müslimînde câriye-i merkūmeyi red ve teslîm eyledim deyü def‘le mukābele edecek akībe’l-istintâk müdde‘î-i mezbûr Veli def‘-i mezbûru inkâr etmeğin mezbûre Ümmühan’dan câriye-i mezkûreyi red ve teslîm eylediğini mübeyyin beyyine taleb olundukda udûl-i Müslimînden Galata hâricinde Cihangir mahallesinden Siyavuş b. Abdullah ve Yayla mahallesinden Kenan Bey b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Ümmühan bundan akdem müdde‘î-i mezbûrdan bi-tarîkı’l-müsâveme ahz eylediği Rusiyyetü’l-asl tahmînen altı yaşında bir re’s sagīre câriyeyi bizim huzûrumuzda müdde‘î-i mezbûr Veli Beşe’ye red ve teslîm ol dahi yedinden kabz ve tesellüm eyledi biz bu husûsa şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl şehâdeteri makbûle olmağın mûcebince mu‘ârazadan men‘ birle mâ-vaka‘a bi’t-taleb ketb olundu. Fî 5 min-Ramazani’l-mübârek li-sene isnâ ve seb‘în ve elf. Şuhûdü’l-hâl: Ali b. Muharrem, Mustafa b. İsa, Veli b. Mahmud, Mehmed b. Ramazan, Hasan b. Mustafa.