İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 344 Hüküm no: 340 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Lütfullah’ın Ahmed b. Mahmud’da olan altı bin akçesini İsmail Ağa b. Osman’ın tahsil ettiği Mahmiye-i İstanbul’da Beytü’l-mâl-i hâssa emîni olan fahrü’l-akrân İsmail Ağa b. Osman meclis-i şer‘de mahmiye-i mezbûrede Dülgerzâde mahallesinde sâkin iken bundan akdem vefât eden Lütfullah nâm sagīrin vasîyy-i şer‘îsi olan Ahmed b. Mahmud nâm kimesne mahzarında ikrâr ve takrîr-i kelâm edip mukaddemâ sagīr-i mezbûra babası Mustafa Efendi nâm müteveffâdan ırsen intikāl edip vasîsi mezbûr Ahmed yedinde mazbût olan atı bin akçe sagīr-i mezbûrun terekesinden olup meblağ-ı mezkûra zâhirde müstehak verese olmamakla mukaddemâ meblağ-ı mezbûru mal-ı gāibdir deyü emânetim hasebiyle vasîyy-i mezbûr Ahmed’den taleb ve ahz murâd eylediğimde ol dahi sagīr-i mezbûrun âhar diyârda amelleri vardır onların hakk-ı mevrûsu olmağla tevkīf olunur deyü meblağ-ı mezkûru bana teslîmden imtinâ‘ eyledikde veresenin huzûru için vasîyy-i mezbûra sekiz ay mehl verilip tecîl olunmayıp el-hâletü hâzihî mehl-i mezbûr hulûl edip zikrolunan veresenin mekânı ve hayat ve memâtları dahi ma‘lûm olmayıp meblağ-ı mezkûr mal-ı mefkūd olmağın hâlâ bi’l-emâne meblağ-ı mezkûru altı bin akçeyi izn-i şer‘le vasîyy-i mezbûr Ahmed yedinden tamamen alıp kabz edip zimmetinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ min-Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-eimme Mehmed Efendi, Ahmed Efendi kâtib-i kassâm, Kadri Beşe b. Muharrem, Mehmed Beşe b. İbrahim, Abdülkerim Beşe b. Rasûl, Abdi Çelebi b. Hüseyin, el-Hâc Ahmed b. Mahmud, Mustafa Çelebi b. İsa