İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 345 Hüküm no: 342 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgi v. Andon’un kemeri ile yüz guruşunu çalan Yorgi v. Yani’nin kemer ile yirmi sekiz guruşu kireçlik üzerine attığı Mahmiye-i İstanbul’da Topkapısı dâhilinde Fâtıma Sultan mahallesinde vâki‘ işbu hâzıratü bi’l-meclis Ergire nâm Nasrâniyenin menzilinde müste’cir olan hâmil-i hâzihi’s-sifr Yorgi v. Andon nâm zimmî meclis-i şer‘de Nasrâniye-i merkūmenin er karındaşı olup ma‘an menzil-i mezbûrda sâkin olan diğer Yorgi v. Yani nâm zimmî muvâcehesinde üzerine da‘vâ edip târih-i kitâb gecesi akşam namazından sonra menzil-i mezbûr dâhilinde sâkin olduğum odaya gelip nazar eylediğimde odanın kapısı açılıp ve dâhilinde vaz‘ eylediğim sandığın kırılıp içerisinde kemer ile yüz guruşum ahz olunduğunu müşâhede edip feryâd eylediğimde mezbûr diğer Yorgi işbu kemerimi elinden menzil-i mezbûr dâhilinde vâki‘ kireçlik üzerine bırakıp ben dahi ahz edip içinde ancak yirmi sekiz guruşluk riyâl ve hurde bulunmağın suâl olunup mâ‘adâsı olan yetmiş iki guruşu bana alıvermek taleb ederim dedikde gıbbe’s-suâl mezbûr diğer Yorgi müdde‘î-i mezbûr yedinde olan kemer kendinin olup ve ol kemeri kireçlik üzerine ilkā eylediğini inkâr edicek evvelâ müdde‘î-i mezbûrdan işbu kemer kendinin mülkü olduğunu mübeyyin beyyine taleb olundukda Nasrânî tâifesinden Rali v. Likin ve Yamandi v. Yani nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu kemer müdde‘î-i mezbûr Yorgi’nin mülkü olduğuna biz şâhidleriz, şehâdet dahi ederiz dediklerinden sonra kemer-i mezbûr târih-i kitâb gecesi akşam namazından sonra mezbûr diğer Yorgi yedinden kireçlik üzerine ilkā eylediğini mübeyyin beyyine taleb olundukda yine tâife-i mezbûreden Novak v. Petro ve İstavroz v. Parişkova nâm zimmîler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu târih-i kitâb gecesi akşam namazından sonra <> müdde‘î-i mezbûr Yorgi odam açılıp içinden bir kemer ile yüz guruşum ahz olunmuş deyü feryâd eylediğimde mezbûr diğer Yorgi elinden işbu kemeri kireçlik üzerine ilkā eylediğini re’yü’l-ayn biz gördük bu husûsa şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde şuhûd-ı mezkûrûnun şehâdetleri ba‘de‘t-ta‘dîl ve’t-tezkiye makbûle olmağın mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’s-sânî min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa b. İsa, Mustafa b. Mehmed, Veli b. Mahmud, Rasûl b. Rıdvan, Mehmed b. Ramazan.