İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 346 Hüküm no: 343 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ali b. Hasan Ali’nin varisleri alacak davasında Şaban Ağa ile sulh oldukları İki bin akçeye sulh. Mahmiye-i İstanbul’da Üsküplü mahallesinde sâkin iken bundan akdem vefât eden Mehmed Ali b. Hasan Ali’nin verâseti vâlidesi Âişe bt. Ramazan nâm hatuna ve li-ebeveyn er karındaşı Mehmed Efendi b. Hasan Ali’ye ve li-ebeveyn kız karındaşları Kerîme ve Şerife ve Ümmügülsüm nâm hatunlara münhasıra olup asl-ı mes’eleleri altı sehmden olup sihâm-ı mezbûrdan bir sehmi vâlidesi merkūme Âişe Hatun’a ve iki sehmi merkūm Mehmed Efendi’ye ve birer sehmi merkūmetân Kerîme ve Şerife ve Ümmügülsüm’den her birine isâbet ve intikāl eylediği şer‘an zâhir ve müte‘ayyin oldukdan sonra merkūm Mehmed Efendi ile merkūmetân Âişe ve Kerîme ve Şerife ve Ümmügülsüm taraflarından husûs-ı âti’l-beyânı da‘vâ ve taleb ve sulh [ve] ibrâya vekîl olup vekâleti İlyas Beşe b. Mehmed ve Mehmed b. Ramazan nâm kimesneler şehâdetleri ile şer‘an sâbit olan Mustafa b. Yusuf mahfil-i kazâda fahrü’l-emâsil ve’l-akrân işbu bâ‘isü’l-kitâb Şaban Ağa b. ( ) mahzarında ikrâr ve takrîr-i kelâm edip mûrisim müteveffâ-yı mezbûr Mehmed merkūm Şaban Ağa’nın hizmetkârı iken fevt olmağla terekesinden müvekkilelerime bundan akdem üç bin akçe irsâl eylediğinden mâ‘adâ beş yüz kıt‘a riyâlî guruş ve sekiz yüz akçe kıymetli bir kelâm-ı izzet ve bir kırmızı ve bir al ve bir sarı makramalar ile bir sırma kuşak ve bir kumaş çintiyan ve bir celâlî sof ve bir serhadli ve bir sâde kılıç ve bir çakmaklı ve bir boylu kol tüfengi ve on beş makrame ve iki velence ve iki yorgan ve iki kebe ve bir döşek ve bir kereke sini ahz u kabz eylemiş idi deyü vekâletim hasebiyle eşyâ-i merkūme ve guruşu mezbûr Şaban Ağa’dan da‘vâ ve taleb eylediğimde ol dahi inkâr etmekle beynimizde münâza‘ât-ı kesîre vâkı‘a olmuş idi el-hâletü hâzihî vesâtet-i muslihîn ile eşyâ-i merkūme ve guruş da‘vâsından mezbûr Şaban Ağa benimle iki bin akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr iki bin akçemi merkūm Şaban Ağa yedinden tamamen ahz u kabz eyledim ba‘de’l-yevm gerek benden ve gerek müvekkillerimden tereke-i müteveffâ-yı mezbûra müte‘allika da‘vâ sudûr ederse lede’l-hükkâmi’l-kirâm mesmû‘a ve makbûl olmasın dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min-Ramazani’l-mübârek li-sene isnâ ve seb‘în ve elf. Şuhûdü’l-hâl: Keşfî Mustafa Efendi b. Muharrem, Ahmed Efendi b. Hanefî, Gazenfer b. Tevekkül, el-Hâc Ahmed b. Mahmud, Rasûl b. Rıdvan, Mustafa b. Mehmed, Mehmed b. Ramazan.