İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 349 Hüküm no: 345 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Ali’den çocuklarına intikal eden Gürcü asıllı cariye Vildan bt. Abdullah’ı İbrahim’in satın alarak azat ettiği Itk-nâme. Mahmiye-i İstanbul mahallâtından Mimar Sinan mahallesinde sâkin iken bundan akdem vefât eden Hadîce bt. Ali nâm hatunun verâseti sadrî oğulları Mehmed Beşe ve Halil Beşe ve el-Hâc İbrahim evlâd-ı Hüseyin nâm kimesnelere münhasıra olduğu şer‘an zâhir oldukdan sonra mezbûrân Halil Beşe ve Mehmed Beşe meclis-i şer‘-i hatîrde karındaşları mezbûr el-Hâc İbrahim mahzarında her biri ikrâr ve takrîr-i kelâm edip vâlidem müteveffâ-yı mezbûrenin muhallefâtından olup ırsen üçümüze intikāl eden açık kaşlı kara gözlü kasîrü’l-kāme Vildan bt. Abdullah nâm câriyeden hisse-i şer‘iyemiz mukābelesinde karındaşımız mezbûr el-Hâc İbrahim yedinden alâ-tarîkı’s-sulh bin sekiz yüz akçe alıp kabz eyledik ba‘de’l-yevm câriye-i mezbûre mezbûr el-Hâc İbrahim’in ırsen ve şer‘an mülküdür dediklerinde gıbbe’t-tasdîk merkūm el-Hâc İbrahim meclis-i ma‘kūdda takrîr-i kelâm edip işbu râfi‘u’l-vesîka Gürciyyetü’l-asl câriye-i mevsûfe-i mezbûreyi hasbeten lillâhi te‘âlâ ve hasbeten li-rûh-ı rasûlihi’l-mu‘allâ mâlımdan âzad ve mülkümden ihrâc eyledim min-ba‘di’l-yevm sâir harâyir-i asliyât gibi hürre olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mehmed Beşe b. Hüseyin, Halil Beşe b. Hüseyin, Ali Ağa b. Mehmed, Mehmed b. Ali, Abdülbaki b. Mehmed, Receb b. Hasan, Ömer b. Osman.