İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 350 Hüküm no: 346 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Osman’ın Haçok v. Yakop’dan alacağı olan yirmi guruşu edaya tenbih olunması İkrâr-ı deyn ve istimhâl. Mahmiye-i İstanbul’da Cibalikapısı dâhilinde Seferikoz mahallesinde sâkin işbu râfi‘u’l-kitâb Ahmed Bey b. el-Hâc Osman meclis-i şer‘de habbâz tâifesinden Haçok v. Yakop mahzarında üzerine da‘vâ ve takrîr-i kelâm edip mezbûr Haçok’un zimmetinde karz-ı şer‘îden otuz iki esedî guruş hakkım vardır suâl olunup alıverilmek matlûbumdur dedikde gıbbe’s-suâl mezbûr Haçok cevâbında müdde‘î-i mezbûra zimmetinde ancak yirmi esedî guruş deynim vardır deyü yirmi guruş ikrâr ziyâde on iki esedî guruşu inkâr edicek müdde‘î-i mezbûrdan ziyâde merkūmeye beyyine taleb olundukda ityân-ı beyyine için istimhâl etmeğin mehil-i şer‘î ile imhâl olundukdan sonra ikrârı mertebesi olan yirmi esedî guruşu edâya tenbîh birle mâ-vaka‘a bi’t-taleb ketb olundu. Fi’l-yevmi’s-sâlis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa b. Mehmed, Abdi b. Hüseyin, Veli b. Mahmud, Rasûl b. Rıdvan, Hasan b. Mustafa.