İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 354 Hüküm no: 351 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa’nın menzilini kızı Rabia’nın vasîsi ve validesi olan Üftade bt. Abdullah’ın Murtaza Efendi b. Mehmed’e sattırdığı Dârü’l-harbde esir olan Salih Ağa’nın sulbiye kızı Râbia nâm sagīrenin tesviye-i umûruna kıbel-i şer‘den mansûbe vasîsi olan vâlidesi Üftade bt. Abdullah meclis-i umdetü erbâbü’t-tahrîr ve’l-kalem Murtaza Efendi b. Mehmed mahzarında bi’l-vesâye takrîr-i kelâm edip mezbûr Salih Ağa’nın mahmiye-i İstanbul’da Kasap İvaz mahallesinde vâki‘ ma‘lûmü’l-hudûd menzilini bey‘ ve semenini ba‘de’l-kabz düyûnunu edâ ve teslîme tarafından mezbûr Murtaza Efendi vekâlet-i devriye ile vekîl olmağla menzil-i mezbûru mûmâ-ileyh Murtaza Efendi yüz doksan bin akçeye âhara bey‘ ve semeninden yüz yetmiş altı bin iki yüz elli akçe deyni vekâleten edâ ve teslîm edip bâkī on üç bin yedi yüz elli akçe yedinde kalmışdır suâl olunup takrîri tahrîr olunmak murâdımdır dedikde gıbbe’s-suâl mezbûr Murtaza Efendi kazıyye vech-i muharrer üzere olduğunu mu‘terif olmağın vâki‘u’l-hâl bi’t-taleb ketb olundu. Fi’s-sânî min-Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-eimme Derviş Efendi, Seyyid Mehmed Efendi b. ( ), Mehmed b. Mehmed, Ali Çelebi b. ( ).