İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 354 Hüküm no: 352 Orijinal metin no: [44a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Musa boşandığı kocası Mehmed b. Mustafa ile alacak davasında sulh oldukları Beş yüz akçeye sulh ibrâ. Mahmiye-i İstanbul’da Çerâğī Hamza mahallesinde sâkine Fâtıma bt. Musa nâm hatun meclis-i şer‘de zevc-i mutallıkı işbu râfi‘u’l-kitâb Mehmed b. Mustafa nâm kimesne mahzarında ikrâr ve takrîr-i kelâm edip mezbûr Mehmed ile zevciyet beynimizde kāime iken zimmetinde karz-ı şer‘îden üç aded altun ve beş esedî guruş hakkım ile bir kırmızı atlas entâri ve bir beyaz sâde ve bir çarşaf ve beş yüz akçe kıymetli on beş aded inci mezbûr Mehmed’in yedinde kalmış idi deyü da‘vâ ve taleb eylediğimde ol dahi cevâbında zikrolunan meblağ-ı mezbûru ve eşyâ-i mezkûreyi inkâr etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî vesâtet-i müslihîn ile an inkâr beş yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh-i mezbûru yedinden tamamen ahz u kabz edip zikri mürûr eden meblağ-ı mezbûr ile eşyâ-i mezkûreye müte‘allik âmme-i de‘âvîden zimmetini ibrâ-i âmm ile ibrâ ve ıskāt eyledim dedikde vâki‘u’l-hâl bi’t-taleb ketb olundu. Fî 3 min-Ramazani’l-mübârek li-sene isnâ ve seb‘în ve elf. Şuhûdü’l-hâl: Musa Çelebi b. Mustafa, Şaban b. Musa, Osman b. Abdullah, Abdi b. Hüseyin, Mehmed b. Mustafa, Mustafa b. Mehmed.