İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 355 Hüküm no: 353 Orijinal metin no: [44a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih Ağa’nın kızı Rabia’nın vekalet-i devriye ile vekili olan Murtaza Efendi b. Mehmed’den varislere günlük nafaka takdir olunduğu Nafaka. Dârü’l-harbde esir olan Salih Ağa’nın sulbiye kızı Râbia’nın tesviye-i umûruna kıbel-i şer‘den mansûbe vasîsi olan vâlidesi Üftade bt. Abdullah meclis-i şer‘de umdetü erbâbü’t-tahrîr ve’l-kalem Murtaza Efendi b. Mehmed mahzarında takrîr-i kelâm edip mezbûr Salih Ağa’nın merkūm Murtaza Efendi vekâlet-i devriye ile vekîli olmağla yedinde menzil semeninden on üç bin yedi yüz elli akçe olmağla mezbûr Salih Ağa’nın kızı sagīre-i mezbûre ile zevcesi Bedahşan ve hizmetlerinde olan ( ) câriyeye kıbel-i şer‘den nafaka karz ve takdîr olunmak murâdımdır dedikde vech-i muharrer üzere mezbûrât nafakaya muhtâclar olmağın kıbel-i şer‘den mezbûr Murtaza Efendi yedinde olan mâldan küllî yevm mezbûrât için on beşer akçe nafaka farz ve takdîr olunup vakt-i zarûrette istidâneye ve lede’z-zafer rücû‘a vasîyy-i mezbûra ba‘de’l-izn mâ-vaka‘a bi’t-taleb ketb olundu. Fi’r-râbi‘ min-Ramazani’l-mübârek li-sene isnâ ve seb‘în ve elf. Şuhûdü’l-hâl: Derviş Efendi el-imâm, Mehmed b. Mehmed, Abdi Çelebi b. Hüseyin, Erzurumî Mehmed Efendi.