İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 357 Hüküm no: 356 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Bey b. Ali’nin Osman Bey b. Ahmed’e borcunu edaya tenbih olunması Dört yüz guruş deyn edâya tenbîh. Mahmiye-i İstanbul’da Seferikoz mahallesinde sâkin işbu râfi‘u’l-kitâb el-Hâc Osman Bey b. Ahmed meclis-i şer‘de İbrahim Bey b. Ali mahzarında üzerine da‘vâ ve takrîr-i kelâm edip mezbûr İbrahim Bey’e târih-i kitâbdan bir buçuk sene mukaddem bir def‘a yüz doksan ve bir def‘a iki yüz on guruş ki cem‘an dört yüz riyâlî guruş ikrâz ve teslîm ol dahi iktirâz ve tesellüm edip hatta zikri mürûr eden iki yüz on guruşu huzûr-ı Müslimînde kendüye teslîm eylediğimde mukaddemâ yüz doksan guruş makbûzu olduğunu alâ-ru’ûsi’l-işhâd ikrâr ve işhâd ve ol meclisde iki yüz on guruşu yedinden ahz u kabz edip meblağ-ı merkūm dört yüz guruş mukābelesinde işbu sipâhiliği ibtidâ ve terakkī tezkiresini yedime rehin vaz‘ u teslîm edip ben dahi ahz u kabz etmiş iken hâlâ meblağ-ı mezbûru taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr İbrahim Bey cevâbında târih-i mezbûrda ancak altmış guruş ahz u kabz eylediğini ikrâr lâkin meblağ-ı mezbûr üç yüz kırk guruşu ahz u kabz ettiğini inkâr edicek müdde‘î-i mezbûr el-Hâc Osman Bey’den müdde‘âsını mübeyyin beyyine taleb olundukda udûl-i ricâlden mahalle-i mezbûre sükkânından Mehmed Efendi b. Mustafa el-imâm ve Ahmed Efendi b. el-Hâc Mehmed el-müezzin ve Kadri Beşe b. Abdülvehhab nâm kimesneler meclis-i şer‘a li-ecli’ş-şehâde hâzırûn olup istişhâd olunduklarında fi’l-vâki‘ târih-i kitâbdan bir buçuk sene mukaddem müdde‘î-i mezbûr el-Hâc Osman Bey iki yüz on kıt‘a riyâlî guruşu bizim huzûrumuzda addedip mezbûr İbrahim Bey’e teslîm ol dahi yedinden ahz u kabz ve yüz doksan riyâlî guruşu dahi mukaddemâ müdde‘î-i mezbûr yedinden ahz u kabz eyledim deyü bi-tav‘ihiikrâr ve i‘tirâf eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’iti’l-kabûl şehâdetleri makbûle olmağın mûcebince meblağ-ı mezbûr dört yüz riyâlî guruşu müdde‘î-i mezbûr el-Hâc Osman Bey’e edâ ve teslîme mezbûr İbrahim Bey’e tenbîh birle mâ-vaka‘a bi’t-taleb ketb olundu. Fi’s-sâmin min-Ramazani’l-mübârek li-sene isnâ ve seb‘în ve elf. Şuhûdü’l-hâl: Ahmed Efendi b. Mehmed, el-Hâc Mustafa b. Abdullah, el-Hâc Mehmed b. Abdul”lah, Muslı Çelebi b. Abdi, Gazanfer b. Tevekkül, Baba Rasûl b. Rıdvan, Abdi Çelebi b. Hüseyin, Mehmed b. Ramazan.