İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 358 Hüküm no: 357 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Durmuş’un varislerinden Ali Beşe kendi hisselerini Murad b. İsa’ya sattığı Mülknâme. Vilâyet-i Anadolu’da Koçhisar kazâsına tâbi‘ Kar nâm karye sâkinlerinden olup bundan akdem vefât eden İbrahim Durmuş’un verâseti sulbî kebîr oğlu Ali Beşe’ye ve sulbiye kebîre kızı Âişe’ye münhasıra olduğu şer‘an zâhir ve müte‘ayyin oldukdan sonra mezbûr Ali Beşe meclis-i şer‘de karye-i mezbûre sâkinlerinden işbu râfi‘u’l-kitâb el-Hâc Murad b. el-Hâc İsa mahzarında ikrâr ve takrîr-i kelâm edip müteveffâ-yı mezbûr İbrahim’in terekesinden olup karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzil ve harman yeri ve bir kıt‘a bağdan üç sehimden iki sehm hisse-i şâyi‘amı mezbûr el-Hâc Murad mukaddemâ bin akçeye bâtten bey‘ ol dahi iştirâ ve kabûl eyledikden sonra babam müteveffâ-yı mezbûrdan bana intikāl-i âdî ile intikāl edip lede’l-ahâlî ve’l-cîrân ma‘lûmü’l-hudûd ve’l-kıta‘ taht-ı tasarrufumda olan tarlaların dahi hakk-ı tasarrufunu ma‘rifet-i sahib-i arz ile mezbûr el-Hâc Murad’a üç bin sekiz yüz akçe bedel mukābelesinde ferâğ ve tefvîz edip ol dahi tefevvüz ve kabûl eyledikden sonra semen-i mezbûr ile bedel-i merkūm cem‘an dört bin sekiz yüz akçemi yedinden tamamen alıp kabz edip emlâk-ı mezbûrede olan iki sehm hisse-i şer‘iyem ile arâzî-i mezbûreyi mahâllinde zabt ve tasarrufa mezbûr el-Hâc Murad’ı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâlis aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: İbrahim Ağa b. el-Hâc Mustafa, el-Hâc Şahbaz b. Hacı Halil, Ahmed Beşe b. Hacı Hamza, Hüseyin Bey el-cündî, Mustafa Efendi b. Nuh, Süleyman Efendi b. Mustafa, Mehmed Çelebi b. Mustafa, Mustafa b. el-Hâc Abbas, Ahmed b. Ahmed, Ali Beşe b. Mehmed, Mehmed Efendi b. el-müezzin, Abdurrahman Çelebi b. Abdullah Efendi, el-Hâc Abdullah b. el-Hâc Mustafa, el-Hâc Mustafa b. el-Hâc Zülfikar, Hacı Mehmed b. el-Hâc Abbas, İbrahim Çelebi b. Ebu Hacızâde.