İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 360 Hüküm no: 359 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Şükrü b. Seyfullah’ın alacak davasında Dilaver Ağa b. Abdullah’la sulh olduğu Sulh. Türkmen tâifesinden Çiskedimli? cemâ‘atinden Osman Şükrü b. Seyfullah nâm kimesne tarafından husûs-ı câbîye vekîl olup Ali Çavuş b. Hüseyin ve Mehmed Çavuş b. Osman nâm kimesneler şehâdetleri ile vekâleti sâbite olan li-ebeveyn karındaşı Ali Bey meclis-i şer‘de sâbıkā Karaman Ereğlisi kazâsı mütevellîsi Dilaver Ağa b. Abdullah mahzarında bi’l-vekâle ikrâr ve i‘tirâf edip müvekkilim karındaşım mezbûr Osman Bey yorulmakla kasaba-i merkūmede sâkin Pürcanoğlu Pir Ali yedine emânet vaz‘ eylediği tavsî? bir pâre devesini mezbûr Dilaver Ağa mütevellî iken yavedir deyü alıp âhara bey‘ ile istihlâk eyledikden sonra mülkü olduğunu şuhûd-ı udûl ile isbât edip kıymet-i şer‘iyesini dahi ba‘de’l-isbât mezbûr Dilaver Ağa’dan almak sadedinde iken mezbûr Dilaver Ağa tavassut-ı muslihîn ile ol deve da‘vâsından müvekkilim mezbûr Osman Bey ile yirmi esedî guruş ile bir mor Londarina çuka kürke üzerine sulh olup ol dahi ber-minvâl-i muharrer sulh-i mezbûru kabûl ve bedeli olan yirmi esedî ve kirkeyi? yedinden alıp ol deveye müte‘allika da‘vâdan mezbûr Dilaver Ağa’yı ibrâ-i âm ile ibrâ ve ıskāt eyledi dedikde, gıbbe’t-tasdîkı’l-mu‘teber mâ hüve’l-vâki‘ bi’t-taleb ketb olundu. Fi’l-âşir min-Ramazani’l-mübârek li-sene isnâ ve seb‘în ve elf. Şuhûdü’l-hâl: Hüseyin Efendi el-Burûsî el-kâtib, Mustafa Efendi el-kādî el-kâtib, Ali Bey b. Hüseyin Çavuş, Abdi Çelebi b. Hüseyin, Mustafa Çelebi b. Mehmed el-muhzır, Mustafa Çelebi b. Ali el-muhzır.