İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 361 Hüküm no: 360 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Osman’ın muhterik dükkân arsasını Hüseyin Ağa’ya sattığı Mübâya‘a. Mahmiye-i İstanbul’da Çoban Çavuşbaşı mahallesinde sâkin Mehmed Çelebi b. Osman meclis-i şer‘-i hatîrde bi’l-fi‘il yeniçeri ocağında zağracıbaşılık mansıbı ile şeref-yâb olan işbu kitâb-ı sıhhat-nisâbın sahibi umdetü’l-emâcid ve’l-ekârim câmi‘ü’l-mehâmid ve’l-mekârim el-Hâc Hüseyin Ağa tarafından ikrâr-ı âti’z-zikri tasdîka vekîl olup nehc-i şer‘î ve vech-i mer‘î üzere vekâleti sâbite olan fahrü’l-emsâl Ahmed Çelebi b. el-Hâc Mehmed mahzarında ikrâr ve takrîr-i kelâm edip akd-i âtî sudûruna dek silk-i mülkümde olup mahmiye-i mezbûrede Lâleliçeşme kurbünde Ahmed Ağa mahallesinde bir tarafdan müşteri-i mezbûr mülküne ve bir tarafdan Ali Çelebi mülküne ve bir tarafdan Mehmed nâm kimesnenin bakkāl dükkânına ve bir tarafdan tarîk-i âmma müntehî muhterik cemî‘ dükkân arsasını bi-cümleti’t-tevâbi‘ ve’l-levâhık mûmâ-ileyh Hüseyin Ağa’ya râyic fi’l-vakt yirmi beş bin akçeye bey‘-ı bâtt-ı sahîh-i şer‘î ile bey‘ u teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezbûr yirmi beş bin akçeyi bi’t-tamam ve’l-kemâl yedinden alıp kabz eyledim ba‘de’l-yevm arsa-i mahdûde-i mezbûre mûmâ-ileyh Hüseyin Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ aşer min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Fahrü’l-akrân Mehmed b. Sinan, fahrü erbâbü’t-tahrîr Mehmed Efendi kâtib-i dîvân, Sarrâc Mustafa Beşe b. Yakub, Ahmed Çelebi b. Mehmed el-müezzin, Ahmed Beşe b. Mehmed, Veyis Beşe b. Mustafa, Mustafa Celil b. Mehmed kâtib-i ağa-yı dîvân ve gayruhum mine’l-hâzırîn.