İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 362 Hüküm no: 361 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Abdullah’ın arsasını kocası Mustafa Ağa b. Hasan’a sattığı Mübâya‘a. Mahmiye-i İstanbul’da Sekbânbaşı İbrahim Ağa mahallesinde sâkine Fâtıma Hatun bt. Abdullah tarafından husûs-ı âtîye vekîl olup zâtını ma‘rifet-i şer‘iye ile ârifân Ali Çelebi b. Mahmud ve Mustafa Çelebi b. Halil şehâdeteri ile şer‘an vekâleti sâbite olan Mustafa Ağa b. Receb nâm kimesne meclis-i şer‘de zevci hâfızü’l-vesîka Mustafa Ağa b. Hasan mahzarında bi’l-vekâle ikrâr ve i‘tirâf edip mahalle-i merkūmede vâki‘ bir tarafı Mehmed Çavuş oğlu Ahmed Ağa mülküne ve bir tarafı Hadîce Hatun Vakfı olan hucurâta ve bir tarafı tarîk-i hâssa ve bir tarafı tarîk-i âmma müntehî mülk arsasını yirmi dört bin akçeye bey‘ u teslîm ol dahi ber-minvâl-i muharrer iştirâ ve tesellüm eyledikden sonra semeni olan yirmi dört bin akçeyi yedinden kabz edip ol arsa mülk-i müşterâsı olup keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: Hüseyin Efendi el-Burûsî, Solak Mehmed Ağa, İsmail Ağa b. Receb, Ahmed Çelebi b. Mahmud el-yesârî, Hüseyin b. Abdullah, Ali b. Muharrem el-muhzır