İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 363 Hüküm no: 364 Orijinal metin no: [45b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Ahmed’e satılan muhterik menzil arsasıyla Oruç Ağa b. Ahmed’de biriken paraların mütevelli Hasan Efendi tarafından tahsil edildiği Mahmiye-i İstanbul’da Büyük Langa kurbünde Alacamescid mahallesinde sâkin olup zamanında Şeyhü’l-islâm olan merhûm Mehmed Efendi’nin evkāfına hâlâ mütevellî olan Hasan Efendi meclis-i şer‘-i hatîr-i lâzımü’t-tevkīrde hâlâ medîne-i Kütahya mütesellimi olan bâ‘isü hâzihi’l-kitâb fahrü’l-akrân Hasan Ağa b. Ahmed tarafından ikrâr-ı âti’l-beyânı tasdîke sâbitü’l-vekâle vekîli olan fahrü’l-a‘yân Oruç Ağa b. Ahmed mahzarında ikrâr ve takrîr-i kelâm edip mahmiye-i mezbûrede Koltaşı? mahallesinde vâki‘ bir tarafdan ba‘zan Ali Beşe ve ba‘zan Ömer Ağa menzillerine ve bir tarafı tarîk-i âm ve bir tarafı Mehmed Çavuş menziline ve bir tarafı ba‘zan Arpa Emîni Mehmed Ağa ve ba‘zan el-Hâc Ali menzilleri ile mahdûd olup harîk-i kebîrde muhterik olan mülk menzil arsasına içinde mevcûd demir kapılı bir mahzen ve fevkinde iki salonlu bir hamam ve üzerinde mevcûd olan nıkzı ile mukaddemâ vakf-ı mezbûr mâlıyla mâlikesi Râziye Hatun’dan iştirâ ve kabûl ve kabz eyledikden sonra zikri mürûr eden muhterik menzil arsasını âhara bey‘ lâzım gelmeğin sûk-ı sultanîde müzâyede olunup ragabât-ı nâs munkatı‘a oldukdan sonra mezbûr Hasan Ağa üzerinde yüz on bin akçede karâr edip ziyâde ile tâlib-i âhar dahi bulunmamağın zikrolunan muhterik menzil arsası içinde mevcûd olan mahzen ve hamam ve üzerinde mevcûd olan nıkzı ile bi-cümleti’t-tevâbi‘ ve’l-levâhık ve kâffetü’l-menâfi‘ ve merâfık yüz on bin râyicü’l-vakt akçeye müvekkil-i mezbûr Hasan Ağa’ya bin yetmiş bir senesi Zilka‘desi’nin yirminci gününde tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ u teslîm ol dahi vech-i muharrer üzere iştirâ ve kabûl ve tesellüm eyledikden sonra semeni olan meblağ-ı mezbûr yüz on bin akçeden on bin akçesini müşteri-i mezbûr Hasan Ağa yedinden ahz u kabz edip meblağ-ı bakī yüz bin akçe zimmetinde kalmış idi hâlâ meblağ-ı bâkī-i mezbûr yüz bin akçeyi tevliyetim hasebiyle vekîl-i mezbûr Oruç Ağa yedinden bi‘t-tamam ve’l-kemâl ahz u kabz eyledim ba‘de’l-yevm zikri mürûr eden muhterik [46a] menzil arsası ve içinde mevcûd olan mahzen ve hamam ve üzerinde mevcûd olan nıkzı müvekkil-i mezbûr Hasan Ağa’nın mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-âşir min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Kutbü’l-ârifin eş-Şeyh Mahmud Efendi, Fahrü’l-a‘yân Mustafa Ağa b. Yusuf sâbıkā mütevellî-i Süleymâniye, Fahrü’l-eşbâh Şeyh Mehmed Ağa, Ömer Ağa b. Abdullah, Hamamcı Ali Çelebi b. Habib, Hasan Çavuş b. Abdullah, İbrahim Bey b. Abdullah, Ahmed b. Ali, Ali b. Abdullah el-hallâk.