İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 364 Hüküm no: 365 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Süleyman’ın Mehmed’den aldığı kırk guruş davasından Abdurrahman b. Eyüp’ün men edildiği Kırk guruşdan bey‘. Mahmiye-i İstanbul mahallâtından Koğacı Dede mahallesinde sâkin iken bundan akdem vefât eden el-Hâc Mustafa b. ( ) nâm kimesnenin sulbiye kebîre kızı ve hasran vârisesi olan Afife nâm hatun tarafından ikrâr-ı câ’i’z-zikri da‘vâ ve taleb ve ahz u kabza ve kendüye îsâle vekîl olup bi-mâ hüve nehci’s-sübût vekâleti sâbite olan zevci es-Seyyid Abdurrahman b. es-Seyyid Eyüp meclis-i şer‘de işbu bâ‘isü’l-kitâb Mehmed Beşe b. Süleyman mahzarında bi’l-vekâle da‘vâ ve takrîr-i kelâm edip müvekkile-i mezbûrenin babası müteveffâ-yı mezbûr yedinden mezbûr Mehmed seksen guruş ahz edip mahmiye-i merkūmda Cebecibaşı mahallesinde vâki‘ beyne’l-ahâlî ve’l-cîrân ma‘lûmü’l-hudûd mülk menzilini yüz doksan gün tamamına değin meblağ-ı merkūm mukābelesnde alâ-tarîkı’l-istiğlâl rehin vaz‘ ve habs edip ve yine menzil-i merkūmu mezbûr Mehmed Beşe’ye tevkīt mezbûr tamamında dokuz yüz akçeye îcâr ol dahi istîcâr ve tesellüm edip hâlâ müvekkile-i mezbûreye intikāl ve tevkīt dahi hulûl etmekle suâl olunup menzil-i mezbûru rehniyetten fek ve meblağ-ı mezbûr seksen esedî guruşu müvekkilem için bana teslîme tenbîh olunması matlûbumdur dedikde gıbbe’s-suâl mezbûr Mehmed Beşe cevâbında kazıyye minvâl-i muharrer üzere olduğunu ikrâr lâkin meblağ-ı mezbûrun kırk esedî guruşunu <> müteveffâ-yı mezbûre hâl-i sıhhatinde def‘ u teslîm edip ancak kırk esedî guruş deynim vardır deyü mukābele edecek gıbbe’l-istintâk mezbûr Mehmed Beşe’den sıdk-ı makāline beyyine taleb olundukda udûl-i Müslimînden olup mahmiye-i mezbûrede Lütfü Paşa mahallesinde sâkin Yusuf Beşe b. Abdullah ve Enserci mahallesinde sâkin Halil Beşe b. Mahmud nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ mezbûr Mehmed Beşe cihet-i mezbûreden müteveffâ-yı merkūma olan seksen esedî guruş deyninden kırk esedî guruşu bizim huzûrumuzda müteveffâ-yı mezbûra def‘ u teslîm ve müteveffâ-yı mezbûr dahi hâl-i hayatında ahz u tesellüm eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müvekkil-i mezbûr Abdurrahman Çelebi zikrolunan kırk guruş da‘vâsından men‘ olunup meblağ-ı bâkī kırk esedî guruşun dahi def‘iyle mezbûr Mehmed Beşe ilzâm olunup mâ hüve’l-vâki‘ bi’t-taleb ketb olundu. Fi’s-sânî aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: Abdi Çelebi b. Hüseyin, Mehmed Beşe b. Hüseyin, Çukadar Osman Beşe, Ahmed Efendi b. ( ).