İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 365 Hüküm no: 366 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mehmed Efendi b. Mehmed’in Mehmed Dede b. Yusuf’dan taleb ettiği para ve eşya davasından men edildiği Yemîn. Mahmiye-i İstanbul’da Timurtaş mahallesinde sâkin İmâm Mehmed Efendi b. Mehmed mahfil-i kazâda Balkapanı tüccârından işbu bâ‘isü’l-kitâb Mehmed Dede b. Yusuf mahzarında üzerine da‘vâ ve takrîr-i kelâm edip bin yetmiş senesi Zilka‘desi’nin on altıncı gününde vâki‘ harîk-i kebîrde bir mukaffel mühürlü sepet sandığımı ve içinde mevcûd yüz elli bin akçe ile yedi kıt‘a nisâ kaftanını merkūm Mehmed Dede’nin Balkapanı kurbünde vâki‘ mahzeninde hıfz için emâneten mezbûrun yedine teslîm eylemiş idim hâlâ mezbûrdan suâl olunup alıverilmek matlûbumdur dedikde gıbbe’s-suâl mezbûr Mehmed Dede cevâbında târih-i mezbûrda merkūm Mehmed Efendi’nin zikri mürûr eden mukaffel ve memhûr sepeti kendüye emânet vaz‘ını ikrâr lâkin târih-i kitâb senesi Cemâziyelûlâsının yirmi beşinci gecesi mahzenimin iki zincirini kırıp ol mahzeni açtıklarında zikri mürûr eden sepet sandığının kilidi benim dahi iki sebet sandığımın kilidleri bozulmuş bulunup içinde mülküm olan iki kumaş kaftan ve bir incili al çuka serpûş ve bir cedîd dülbend ve iki harîr şal ve üç sırmalı makrama ve beş pâre ketân bezi ve bir çuka yeşil sermedi ve bir meşin kîse içinde mevcûd üç yüz elli esedî guruş ve yüz kırk sikke-i hasene ve yüz riyâlî guruş ve bir beyaz kîse içinde mevcûd on bin hurda akçe ve bir kırmızı kîse içinde mevcûd dört bin beş yüz akçem ma‘an hufyeten ahz olunmuş idi deyü cevâb verecek gıbbe’l-istintâk ve’l-inkâr mezbûr Mehmed Dede emîn olup yemîniyle musaddak olmağla meblağ-ı mezbûr yüz elli bin akçe ile yedi kıt‘a nisâ kaftanını kendi ahz etmeyip ve te‘addî ve taksîr etmediğine mevkūfen ale’l-yemîn mâ hüve’l-vâki‘ bi’t-taleb ketb olundu. Fi’l-âşir min-Ramazani’l-mübârek li-sene isnâ ve seb‘în ve elf. Şuhûdü’l-hâl: Ali Ağa b. Oruç, Mehmed Ağa b. Mahmud muhzırî, Hüseyin Beşe b. Sinan, Dilaver Beşe b. Abdullah, Çinici Mehmed Çelebi, Mustafa Bey b. ( ), el-Hâc Mehmed b. Hüseyin, Hasan Bey b. ( ), Mustafa Dede çinici, es-Seyyid Hasan Efendi b. es-Seyyid Hasan, İsa b. Ahmed Ağa, Mehmed Ağa b. İsa, Mehmed Çavuş b. Hayyam, Ali b. el-Hâc Mustafa, Mehmed Çelebi b. Abdülbaki, Mustafa b. İlyas, es-Seyyid Ahmed b. Cafer, Mustafa b. Hasan.