İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 366 Hüküm no: 367 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehriban bt. Abdullah’ın varislerinin İbrahim Efendi b. Ahmed ile para ve eşya davasında sulh oldukları Vilâyet-i Anadolu’da Yedidivan kazâsına tâbi‘ Vayda? nâm karyede sâkine iken bundan akdem fevt olan Şehriban bt. Abdullah’ın verâseti zevc-i metrûku Ahmed Çelebi b. İsa’ya ve sadriye kebîre kızı Alime’ye ve li-ebeveyn karındaşı oğulları Muslı ve Hüseyin ve Hasan’a münhasıra olduğu şer‘an zâhir ve müte‘ayyin oldukdan sonra mezbûrân Muslı ve Alime kendi taraflarından asîl ve mezbûrân Hüseyin ve Hasan taraflarından husûs-ı âti’z-zikre vekîl olup Ahmed b. Abdullah ve Receb b. Mehmed şehâdetleri ile şer‘an vekâletleri sâbite oldukdan sonra vekâleten meclis-i şer‘de işbu bâ‘isü’l-vesîka İbrahim Efendi b. Ahmed mahzarında asâleten ve vekâleten ikrâr ve i‘tirâf edip mezbûr Şehriban merkūm İbrahim Efendi’nin babası mezbûr Ahmed’in taht-ı nikâhında iken fevt olmağın terekesinden on yedi kara sığır ineği ve sekiz kara sığır öküzü ve bir sîm bilezik ve altmış gömlek ve iki bin nakid akçeyi mezbûr İbrahim Efendi ahz u kabz etmeğin meblağ-ı mezbûr ile eşyâ-i merkūmeyi mezbûr İbrahim Efendi’den asâleten ve vekâleten da‘vâ ve taleb eylediğimizde beynimizde münâza‘ât-ı kesîre vâkı‘a olmuş idi el-hâletü hâzihî tavassut-ı muslihîn ile da‘vâ-yı mezbûreden merkūm İbrahim Efendi bizim ile bin iki yüz akçe üzerine inşâ-i akd-i sulh eyledikde biz dahi sulh-i mezbûru kabûl ve bedel-i sulh olan meblağ-ı mezbûru merkūm İbrahim Efendi yedinden asâleten ve vekâleten ahz u kabz edip müteveffât-ı mezbûrenin cemî‘ terekesinden mezbûr İbrahim Efendi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledik ba‘de’l-yevm [46b] müteveffât-ı mezbûrenin kalîl ve kesîr ve celîl ve hakīr terekesine müte‘allika dahi merkūm İbrahim Efendi ile vechen mine’l-vücûh ve sebeben mine’l-esbâb da‘vâ ve nizâ‘ım ve alâka ve medhalim yokdur da‘vâ dahi edersek lede’l-hükkâm mesmû‘a ve makbûle olmasun dedikde gıbbe’t-tasdîk mâ hüve’l-vâki‘ bi’t-taleb ketb olundu. Fî-gurreti şehr-i Ramazan li-sene isnâ ve seb‘în ve elf Şuhûdü’l-hâl: Osman Efendi b. Mustafa, Halil Beşe b. ( ), Hüseyin Beşe b. Hasan, Mehmed Efendi b. Gülâbî, Osman Çelebi b. Derviş, Ali Beşe b. Şaban, Sunullah Efendi b. ( ).