İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 368 Hüküm no: 370 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdülmennan Hatun’un boşandığı kocası İbrahim b. Abdurrahman ile zimmetlerini ibra ettikleri Üç yüz akçeden ziyâde eşyâdan tarafeynin zimmeti ibrâ. Mahmiye-i İstanbul’da Müftü Ali Çelebi mahallesinde sâkine Hadîce bt. Abdülmennan Hatun mahfil-i kazâda işbu bâ‘isü’l-kitâb zevc-i mutallıkı İbrahim b. Abdurrahman nâm kimesne mahzarında bi-tav‘ihâ ikrâr ve takrîr-i kelâm edip mezbûr İbrahim beni talâk-ı bâyin ile tatlîk eyledikde zimmetinde mütekarrir ve ma‘kūdün-aleyh olan bin yüz akçe mehr-i müeccelimin bin akçesini yedinden ahz u kabz edip meblağ-ı bâkī yüz akçe ile nafaka-i iddet-i ma‘lûmem ve me’ûnet-i süknâm için cânib-i şer‘den üzerine farz ve takdîr ve ta‘yîn olunan yevmî on akçeden dokuz yüz akçe ki cem‘an bin akçe zimmetinde hakkım vardır deyü bundan akdem mezbûrdan da‘vâ ve taleb eylediğimde ol dahi benim eşyâ-i memlûkemden beş beledî yasdık ve dört sahan ve bir hamam tası ve bir beledî döşek ve iki yüz yirmi beş akçe kıymetli bir cilâlı ve iki riyâlî guruş ve bir mor yelek ve otuz altı semen? ve bir esedî guruş ve kırk akçe ve bir câriye pençiği ve bir kırmızı Londra zenne ferâce ve bir köhne neftî zenne ferâcemi ahz u kabz eylemiş idik ve yedinden da‘vâ ve taleb etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî vesâtet-i muslihîn ile da‘vâ-yı mezbûremden mezbûr İbrahim benimle yedi yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan yedi yüz akçeyi mezbûr İbrahim yedinden tamamen ahz u kabz eyledikden sonra ziyâde üç yüz akçe da‘vâsından ben mezbûrun zimmetini ol dahi zikrolunan eşyâ da‘vâsından benim zimetimi ibrâ-i amm-ı kātı‘u’n-nizâ‘la ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: Şaban Çelebi ser-yiğit, Mehmed Bey b. Abdullah, Ahmed b. Mustafa, Mehmed Bey b. Emrullah, Hüseyin Çavuş b. Murad el-mübâşir, Mustafa b. Mehmed.