İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 373 Hüküm no: 376 Orijinal metin no: [47b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Süleyman’ın kocası Ahmed Beşe b. Süleyman’dan boşanarak zimmetini ibra ettiği İbrâ. Mahmiye-i İstanbul’da Darbhâne kurbünde Yakub Ağa mahallesinde sâkine sinn ve cüssesinin bulûğa tahammülü olup bulûğunu mu‘terife olan Rukiye bt. Yusuf meclis-i şer‘-i hatîr-i lâzımü’t-tevkīrde zevci bâ‘isü’l-vesîka Ahmed Beşe b. Süleyman mahzarında tâyi‘an ikrâr ve takrîr-i kelâm edip zevcim mezbûrun zimmetinde mütekarrir ve ma‘kādün-aleyh bin akçe mehr-i müeccelim ile kadr-ı ma‘rûf nafaka-i iddet-i ma‘lûmem ve me’ûnet-i süknâm dahi kendi üzerime olmak üzere silk-i mülk-i sahîhimde münselik olup kıymetleri beynimizde ma‘lûm eşyâmdan bir beledî döşek ve bir minder ve dört Yemenî yasdık ve iki munakkaş yorganı ve bir alaca çarşaf ve üç tencere ve bir tepsi ve beş küçük sahan ve bir hamam tası ve bir hoş-âb tası ve üç bin nakid akçe üzerlerine beynimizde hüsn-i zindegânemiz olmamakla mezbûr Ahmed Beşe ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl ve bedel-i hul‘-ı mezbûru mezbûr Ahmed Beşe’nin yedinden tamamen def‘ u teslîm eyledim ba‘de’l-yevm zevciyete ve gayra müte‘allika de‘âvî ve mutâlebât ve eymân ve muhâsamâtdan bir birimizin zimmetini ibrâ ve ıskāt eyledikden sonra târih-i kitâba gelince beynimizde vâki‘ ahz u i‘tâ ve mu‘âmelât-ı şettâya müte‘allika da‘vâdan dahi birbirimizin zimmetini ibrâ ve ıskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî Aşer min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Rasûl b. Mehmed, Hüseyin b. Rıdvan, İbrahim Beşe b. Abdullah, Muharrem b. Şaban, Musa b. Süfyan.