İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 376 Hüküm no: 381 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Beşe’nin oğlu Hamza’ya intikal eden ve Zülfikâr Ağa b. Abdullah tasarrufunda olan menzili Sâliha bt. Abdülvahhab’ın varis olarak zapt ettiği Mülknâme. Mahmiye-i İstanbul’da Müftü Ali Çelebi mahallesinde sâkin olup zikri âtî menzile mülkiyet üzere vâzı‘atü’l-yed olduğu şer‘an sâbit olan Sâliha bt. Abdülvahhab nâm hatun meclis-i şer‘de hâfızü’l-vesîka el-Hâc Ahmed b. Musa mahzarında ikrâr ve i‘tirâf edip mahalle-i merkūmede vâki‘ bir tarafdan Bornaz İsmail Bey mülküne ve bir tarafı Halil Efendi mülküne ve bir tarafı mahalle-i merkūmede imâm vakfı olan menzile ve bir tarafı tarîk-i âmma müntehi iki bâb fevkānî odayı ve bir bâb tahtânî odayı ve iki su kuyusunu ve iki kenîfi ve cüneyneyi ve bir zîr-i zemîni müştemil mülk menzili bundan akdem Ömer Beşe nâm râcilin mülkü iken mezbûr Ömer Beşe hâl-i sıhhatinde benim için merkūme Sâliha Hatun teyzem kızı ve zî-rahm cihetinden karımdır deyü ikrâr ve mukır[ran] alâ-zâlike’l-ikrâr fevt olup ol menzil sulbî oğlu Hamza nâm sagīre intikāl eyledikden sonra mezbûr dahi fevt oldukda Dergâh-ı âlî mahkemelerinin beytü’l-mâllarını kabza me’mûr olan gāib ani’l-meclis Zülfikar Ağa b. Abdullah sagīr-i mezbûrun zâhirde vârisi olmamak zu‘muyle menzil-i mezbûra vaz‘-ı yed edip ben dahi cihet-i merkūmeden hasran vârisesi olduğumu muvâcehesinde da‘vâ ve merkūm inkâr eyledikde şuhûd-ı udûl ile ber-vech-i şer‘î isbât edip menzil-i mezbûru yedinden alıp zabteylediğimden sonra [48b] seksen beş bin akçeye mezbûr el-Hâc Ahmed’e bey‘ ve teslîm ol dahi ber-minvâl-i muharrer iştirâ ve tesellüm eyledikden sonra semeni olan beş bin akçeyi yedinden kabz eyledim. Min-ba‘d menzil-i mezbûr merkūm el-Hâc Ahmed’in mülk-i müşterâsıdır. Keyfe mâ [yeşâ] ve yahtâr mutasarrıf olsun dedikde mukırra-i mezbûreyi ikrâr-ı meşrûhunda mezbûr el-Hâc Ahmed dahi vicâhen tahkīk ve şifâhen tasdîk etmeğin mâ hüve’l-vâki‘ bi’t-taleb ketb olundu. Fi’s-sâdis aşer min-Ramazan li-sene isnâ ve seb‘în ve elf. Şuhûdü’l-hâl: Salih Efendi b. Salih el-imâm, müezzin Mehmed Halîfe, Süleyman Efendi, imâm Mustafa Efendi, Ali Çelebi b. Mehmed, Hüseyin Efendi el-Burûsî, Abdülkadir Efendi b. Hüseyin, Ahmed Çelebi b. Şaban, Durmuş Çelebi bin Ebîbekir, Ahmed Çelebi b. el-Hâc Yakub, Abdullah Çelebi b. Abdullah, el-Hâc Mehmed b. Abdullah, Kadı Mustafa Efendi, Ahmed Efendi el-kādî, Abdi Çelebi b. Hüseyin, Veli Bey b. Mahmud.