İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 377 Hüküm no: 382 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Ali Çavuş’un çocuklarını kalan yanık ev arsasının Hasan Ağa’ya satılması Mübâya‘a. Husûs-ı âti’l-beyânın mahâllinde tahrîri iltimâs olunmağın cânib-i şer‘den Mevlânâ Mustafa Efendi b. el-Hâc Hüseyin irsâl olunup ol dahi mahmiye-i İstanbul’da vâki‘ Hayda[r]hâne mahallesinde sâkin hâlâ Dergâh-ı âlî yeniçerilerinin Ortaçavuşu olan umdetü’l-emâcid ve’l-ekârim Nasuh Ağa’nın menziline varıp zeyl-i vesîkada mastûrü’l-esâmî olan Müslimîn huzûrlarında akd-i meclis-i şer‘î eyledikde mahalle-i mezbûrede Kızılminâre mahallesinde sâkin iken bundan akdem fevt olan Ahmed Ağa b. Ali Çavuş nâm müteveffânın verâseti sulbî oğlu Mustafa Çelebi nâm sagīre ve sulbiye kebîre kızları Hadîce ve Fâtıma ve Safiye nâm hatunlara münhasıra olduğu şer‘an zâhir ve mütehakkık oldukdan sonra sagīr-i mezbûr Mustafa Çelebi’nin tesviye-i umûruna kıbel-i şer‘den mansûbe vasîsi olan fahrü’l-muhadderât müteveffâ-yı mezbûrun li-ebeveyn kız karındaşı Sâliha Hatun tarafından arsa-i âti’z-zikri bey‘ ve teslîm ve kabzı semene vekîl olup zât-ı mezbûreyi ma‘rifet-i şer‘iye ile ârifân olan Hüseyin Bey b. Mehmed el-cündî ve Kalender Beşe b. Abdullah nâm kimesneler şehâdetleri ile şer‘an vekâleti sâbite olan Yaya beylerinden kıdvetü’l-emâsil ve’l-akrân Ahmed Ağa b. Abdülmennan ve mezbûre Safiye Hatun tarafından kezâlik vech-i muharrer üzere arsa-i menzil-i âti’l-beyânı bey‘ ve teslîm ve kabz-ı semenine vekîl olup zât-ı mezbûreyi ma‘rifet-i şer‘iye ile ârifân Ahmed Ağa b. Abdullah ve Mustafa Çelebi b. Mirza şehâdetleri ile şer‘an vekâleti sâbite olan Hüseyin Bey b. Mehmed nâm kimesneler bi’l-vekâle ve mezbûre Hadîce ve Fâtıma bi’l-asâle meclis-i ma‘kūd-ı mezbûrda hâlâ Dergâh-ı âlî yeniçerilerinin ocağında Küçükçavuş olan umdetü’l-a‘yân sahibü’l-kitâb Hasan Ağa b. Mehmed mahzarında her biri ikrâr ve takrîr-i kelâm edip müteveffâ-yı mezbûr Ahmed Ağa’dan sagīr-i mezbûr Mustafa ile müvekkile-i mezbûre Safiye ve Hadîce ve Fâtıma’ya irsle intikāl eden zikrolunan Kızılminâre mahallesinde vâki‘ bir tarafı Çaşnigirbaşı menzili demekle ma‘rûf mezbûre Hadice’nin muhterik menzil arsası ve bir tarafı Doğancıbaşı menzili bir tarafı tarîk-i hâs ve taraf-ı râbi‘i tarîk-i âm ile mahdûd bir hamamı ve bir mahzeni ve iki su kuyusunu müştemil içinde acı çeşme ayağı geçen mülk menzil bin altmış Zilka‘de’sinin on altıncı gününde vâki‘ harîk-i gālibde bi’l-külliye muhterik olup arsası kalıp ve sagīr-i mezbûrun nafakaya eşedd-i ihtiyâcı olmağın arsa-i mezbûre bey‘a arz olunup sûk-ı sultanîde müzâyede olundukda ragabât-ı nâs bi’l-külliye münkatı‘a oldukdan sonra yüz yirmi iki bin akçeye mûmâ-ileyh Hasan Ağa üzerinde karâr edip ziyâde ile tâlib-i âhar zuhûr etmemeğin arsa-i mahdûd-ı mezkûreyi bi-cümleti’t-tevâbi‘ ve’l-levâhık menzili râyic fi’l-vakt yüz yirmi iki bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve teslîm ol dahi ber-vech-i muharrer iştirâ ve kabz ve tesellüm eyledikden sonra semeni olan meblağ-ı mezbûru müşârün-ileyh Hasan Ağa yedinden tamamen alıp her birimiz asâleten ve vekâleten kabz eyledik. Min-ba‘d arsa-i mahdûd-ı mezkûre müşârün-ileyh Hasan Ağa’nın mülk-i müşterâsıdır keyfe mâ yeşâ mutasarrıf olsun dediklerinde gıbbe’t-tasdîkı’ş-şer‘î sagīr-i mezbûrun ber-minvâl-i meşrûh nafakaya eşedd-i ihtiyâcı sikāt-ı Müslimîn ihbâr eylediklerinde vâki‘ hâli mevlânâ-yı mezbûr mahâllinde tahrîr ve ma‘an irsâl olunan Ahmed bin Mehmed ile meclisde alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sânî aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ortaçavuşu Nasuh Ağa, Ahmed Ağa b. Abdullah, es-Seyyid Muslu Çelebi b. es-Seyyid Ömer, Ahmed Ağa b. Veli er-râcil, Ali Efendi b. Halil el-imâm, Mustafa b. Abdülkerim, Abdüsselam b. Salih yazıcı, Hüseyin Ağa b. Abdi.