İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 379 Hüküm no: 383 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Beşe b. Hüseyin’in Safranbolu Bağlarbaşı mevkiinde bulunan bağını Ali Beşe b. Hamza’ya satması Mübâya‘a. Fi’l-asl vilâyet-i Anadolu’da Safranbolu [Za‘feranbolusu] kazâsından olup hâlâ müsâferet tarîki üzere mahmiye-i İstanbul’da Sultan Mehmed Câmi‘-i şerîfi kurbünde sâkin Mehmed Beşe b. Hüseyin meclis-i şer‘de işbu râfi‘u’l-kitâb Ali Beşe b. Hamza mahzarında tâyi‘an ikrâr ve takrîr-i kelâm edip akd-i âtî sudûruna değin silk-i mülkümde olup kazâ-i mezbûrede Bağlarbaşı demekle ma‘rûf mahâlde vâki‘ bir tarafdan Şaban menziline ve bir tarafdan Muhtâr nâm kimesne menziline ve bir tarafdan Hamza oğlu Ramazan nâm kimesne menziline ve bir tarafdan tarîk-i âmma müntehî bir bâb tahtânî odayı hâvî bir kıt‘a mülk bağımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Ali Beşe’ye râyic fi’l-vakt altı bin akçeye mezbûr Ali’ye bâtten bey‘ edip ol dahi minvâl-i muharrer üzere iştirâ eyledikden sonra semeni olan meblağ-ı mezbûr altı bin akçeyi tamamen yedinden alıp kabz edip mahâllinde kabz ve tasarruf ve tesellüme mezbûr Ali Beşe’yi taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc Halil Beşe b. el-Hâc Mehmed, el-Hâc İbrahim b. el-Hâc Mehmed, el-Hâc Abdullah Çelebi b. ( ), Emrullah b. Nasuh, Hasan b. el-Hâc Hüseyin, Mustafa Beşe b. İbrahim.