İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 379 Hüküm no: 384 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed bin Mehmed’in Kızılcatuzla Babaderesi köyünde babasından kendisine kalan ve sahib-i arzdan satın alan Hasan’a açtığı davadan vazgeçtiği Tarla da‘vâsından kasr-ı yed. Vilâyet-i Anadolu’da Kızılcatuzla kazâsına tâbi‘ Babaderesi nâm karyeden Mehmed bin Mehmed nâm kimesne meclis-i şer‘-i hatîrde bâ‘isü’l-vesîka el-Hâc Hasan Beşe b. Abdi mahzarında ikrâr ve i‘tirâf edip karye-i mezbûrede vâki‘ etrâf-ı erba‘ası karye-i mezbûre çeşmesi ayağı ve Çayırpınarı ve el-Hâc Hasan tarlası ve Dimyatlıoğlu tarlası ve Müezzinoğlu tarlası ve Ejderhaoğlu tarlası ve tarîk-i âm ile mahdûd tahmînen yüz dönüm bir kıt‘a tarla babam mezbûr Mehmed’in taht-ı tasarrufunda olup vefât etdikde zikrolunan bir kıt‘a tarla intikāl-i âdî ile bana intikāl etmiş iken mezbûr el-Hâc Hasan sahib-i arzdan zikrolunan tarlayı yetmiş seneden beri boz ve hâlî kılıp zirâ‘at ve hirâset olunmamağla beş yüz elli akçeye tefevvüz ve kabûl etmekle ben dahi zikrolunan tarlayı mezbûr el-Hâc Hasan’dan da‘vâ ve taleb etmiş idim. El-hâletü-hâzihî da‘vâ-yı mezbûreden fâriğ olup kasr-ı yed eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min-Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc Halil Mehmed, Hasan Dede b. Bâyezid, Abdi Çelebi b. Hüseyin, Baba Rasûl b. Ramazan, Mehmed Çelebi b. ( ), Osman b. Abdullah, Mustafa b. Ömer, Mehmed b. Ramazan.