İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 380 Hüküm no: 386 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlı Efendi tarafından Emine Hatun vakfından evi karşılığı aldığı paranın oğlu tarafından vakfa verilmesi üzerine evin Fazlı Efendi’nin oğlu Mustafa’ya verildiği İstiğlâl. Mahmiye-i İstanbul’da diğer Emine Hatun vakfında hâlâ mütevellî olan Ahmed Çelebi b. Mustafa nâm kimesne meclis-i şer‘de Mustafa Efendi b. Fazlı Efendi mahzarında bi’t-tevliye ikrâr ve i‘tirâf edip müteveffâ-yı mezbûr Fazlı Efendi hâl-i sıhhatinde mahmiye-i merkūmede Molla Ahaveyn mahallesinde vâki‘ bir tarafdan Hadîce Hatun mülküne ve bir tarafdan süknâsı ulemâya meşrûta vakf menzile ve bir tarafdan ba‘zan Ahmed Ağa mülküne ve ba‘zan mescid-i şerîfe ve bir tarafdan tarîk-i âmma müntehî büyût-ı adîdeyi müştemil mülk menzilini vakf-ı mezbûrdan ikrâz ve kabz eylediği beş yüz riyâlî guruşa bi-tarîkı’l-istiğlâl bey‘ ve teslîm etmiş idi. El-hâletü-hâzihî sekiz yüz dirhem beş yüz riyâlî guruşu mezbûr Mustafa Efendi yedinden vakf için kabz edip menzil-i mezbûru merkūm Mustafa Efendi’ye teslîm eyledim dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’s-sânî aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Sâbıkā Siroz Kadısı Çatalzâde Ahmed Efendi, Hasan Ağa-i Tırnovî, Ramazan Çelebi b. ( ), Berber Hüseyin Çelebi b. ( ), Memiş Beşe b. Mehmed, Osman Çelebi b. Abdurrahman, Abdi b. Hüseyin.