İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 381 Hüküm no: 387 Orijinal metin no: [49a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balya’ya bağlı Kırzılar köyünden Mehmed b. Durak’ın Mustafa b. Mehmed’e harabe ev arsasının satması Mübâya‘a. Vilâyet-i Anadolu’da Biga sancağında Balya kazâsına tâbi‘ Kırmızılar nâm karyede sâkin Mehmed b. Durak nâm kimesne meclis-i şer‘-i hatîrde işbu râfi‘u’l-kitâb el-Hâc Mustafa b. Mehmed [nâm] kimesne mahzarında tâyi‘an ikrâr ve takrîr-i kelâm edip akd-i âtî sudûruna değin mülk-i silkimde olup karye-i mezbûrede vâki‘ bir tarafdan Maden nâm kimesne mülküne ve bir tarafdan Demirci Kanberoğlu Mehmed mülküne ve bir tarafdan el-Hâc Mustafa b. Mehmed mülküne ve bir tarafdan tarîk-i âmma müntehî harâbe menzil arsasını bi-cümleti’t-tevâbi‘ ve’l-levâhık mezbûr el-Hâc Mustafa’ya râyic fi’l-vakt on iki zolota guruşa bâtten bey‘ ol dahi ber-minvâl-i muharrer iştirâ eyledikden sonra semeni olan meblağ-ı mezbûr on iki zolota guruşu tamamen yedinden alıp kabz edip mahâllinde arsa-i merkūmeyi kabz ve tesellüm ve tasarrufa el-Hâc Mustafa’yı taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-işrîn min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa b. Mehmed, Mehmed b. Ramazan, Hüseyin b. Pîrî, Veli b. Mahmud, Rasûl b. Rıdvan.