İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 385 Hüküm no: 393 Orijinal metin no: [49b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma Hatun bt. Mustafa’nın Hüseyin Beşe’den satın aldığı Rus asıllı Cariye Mariya’nın frengî hastası olduğunu bilerek satın almasından dolayı iade edemeyeceği Yemînden nükûl. Medîne-i Galata’ya tâbi‘ Kasım Paşa’da Hadîce Hatun mahallesinde sâkine Fâtıma Hatun bt. Mustafa meclis-i şer‘de bâ‘isü’l-vesîka Hüseyin Beşe b. Hasan nâm kimesne mahzarında üzerine da‘vâ ve takrîr-i kelâm edip târih-i kitâbdan yirmi bir gün mukaddem işbu orta boylu açık kaşlı elâ gözlü sarışın Rusiyetü’l-asl Mariya nâm câriyeye cemî‘ uyûbdan sâlime olmak üzere bir kıt‘ası yedişer dirhem altmış riyâlî guruşa mezbûr Hüseyin Beşe’den iştirâ ve kabz ve def‘-i semen eylemiş idim. Hâlâ câriye-i mevsûfe-i mezbûrenin uylukları frenk marazı ile mu‘ayyebe olup inde’t-tüccâr nakz-ı semen îcâb eder ayb-ı kadîm olmağla mezbûra reddolunup semeni alıverilmek matlûbumdur dedikde gıbbe’s-suâl mezbûr Hüseyin Beşe cevâbında fi’l-vâki‘ câriye-i mezbûreyi vech-i mübeyyen üzere mezbûre Fâtıma’ya bey‘ ve kabz-ı semen eylediğini ikrâr lâkin ayb-ı mezbûr ile bey‘ edip mezbûre Fâtıma dahi ayıbına muttali‘ olduğu hâlde iştirâ ve kabz ve kabûl eyledi deyücek akībe’l-istintâk ve’l-inkâr mezbûr Hüseyin Beşe’den sıdk-ı makāline muvâfık beyyine taleb olundukda ityân-ı beyyineden izhâr-ı acz edip istihlâf etmeğin câriye-i mezbûreyi ayb-ı mezbûr ile merkūm Hüseyin Beşe’den iştirâ eylemeyip ve kabûlünü müş‘ir kavlen ve fi‘ilen bir şey kendinden sâdır olmadığına mezbûre Fâtıma’ya yemîn teklîf olundukda nükûl etmeğin mezbûre Fâtıma bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sânî aşer min-Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa Çelebi b. Musa, Mehmed Çelebi b. Yusuf, Abdi Çelebi b. Hüseyin, Rasûl b. Rıdvan, Kasab Mustafa b. ( ) el-muhzır.