İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 385 Hüküm no: 394 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihaliç’in Haydar köyünden Receb Beşe b. Mehmed’in Hüseyin Beşe’de olan alacağı Yemîn. Vilâyet-i Anadolu’da Mihaliç kazâsına tâbi‘ Haydar nâm karyede sâkin Receb Beşe b. Mehmed nâm kimesne mahfil-i kazâda hâlâ Mihaliç Serdârı olan işbu râfi‘u’l-kitâb Hüseyin Beşe b. Mehmed nâm kimesne mahzarında üzerine da‘vâ ve takrîr-i kelâm edip mukaddemâ mezbûr Hüseyin Beşe bi-gayr-ı vech-i şer‘î benim yirmi esedî guruşumu ahz etmişdir taleb ederim suâl olunsun dedikde gıbbe’s-suâl mezbûr Hüseyin Beşe cevâbında fi’l-vâki‘ mezbûr Receb Beşe’nin beynimizde ma‘lûm bir mesâlihi için bin akçesini kabz eyledim deyü ikrâr ve ziyâdeyi inkâr edicek müdde‘î-yi mezbûrun müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin mezbûr Hüseyin Beşe’ye ikrârından ziyâde olan bin dört yüz akçeyi ahz eylemediğine yemîn teklîf olundukda ol dahi halfü billâhi te‘âlâ etmeğin ikrârı mûcebince meblağ-ı mezbûr bin akçenin müdde‘î-yi mezbûra edâsı için mezbûr Hüseyin Beşe’ye tenbîh birle mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Yusuf Beşe b. Sinan el-mübâşir, Gazanfer b. Tevekkül, Mehmed b. Mustafa, Mehmed Çelebi b. Hasan.