İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 386 Hüküm no: 395 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Sefer’in Nikola v. Yorgi’ye sattığı kerestenin parasını aldığı Kabz-ı semen-i kereste. Mahmiye-i İstanbul hısnı ebvâbından Kumkapısı kurbünde sâkin Mehmed Çelebi b. Sefer nâm kimesne meclis-i şer‘-i hatîrde Narlıkuyu hâricinde sâkin olup meyhâne tâifesinden işbu râfi‘u’s-sifr Nikola veled-i Yorgi nâm zimmî mahzarında ikrâr ve takrîr-i kelâm edip mezbûr Nikola zimmetinde yedimden müşterâ ve makbûz adedi ve cinsi beynimizde ilm-i şer‘î ile ma‘lûm kereste bahâsından ba‘de küllî hesâb bin yedi yüz otuz yedi akçe hakkım olmağla hâlâ meblağ-ı mârrü’z-zikri mezbûr Nikola yedinden bi’t-tamam ve’l-kemâl ahz u kabz eyledim. Zikr olunan keresteye müte‘allik merkūm Nikola ile da‘vâ ve nizâ‘ım kalmadı dedikde mukırr-ı merkūmun ikrârını el-mukarru leh el-merkūm Nikola bi’l-muvâcehe tasdîk ve bi’l-müşâhede tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa b. İsa, Mehmed Çelebi b. Halil, Mehmed b. Mustafa, Mehmed b. Ali, Ahmed Çelebi b. Hasan.