İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 387 Hüküm no: 397 Orijinal metin no: [50a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balya’nın Kırmızılar köyünden Hasan b. Timur, Mustafa bin Ahmed’in mallarını elinden alarak kendine zulmettiği iddiasıyla açtığı davaya delil getiremediği Yemîn. Vilâyet-i Anadolu’da Balya kazâsına tâbi‘ Kırmızılar nâm karye ahâlîsinden Hasan b. Timur nâm kimesne meclis-i şer‘de Dergâh-ı âlî yeniçerilerinin onuncu cemâ‘atine mahsûs oda ahâlîsinden olup hâlâ kazâ-i mezbûrede sâkin bâ‘isü’l-vesîka el-Hâc Mustafa b. Mehmed nâm mahzarında üzerine da‘vâ ve takrîr-i kelâm edip târih-i kitâbdan iki ay mukaddem mezbûr el-Hâc Mustafa Beşe Şahin ve Yusuf nâm gulâmlarını gönderip bi-gayr-ı vech-i şer‘î bin akçe kıymetli bir re’s karasığırımı ahz ve istihlâk etdirdiğinden mâ‘adâ yine bir def‘a dahi gulâmları mezbûrân Şahin ve Yusuf’u gönderip iki re’s karasığır çiftimi fuzûlî ahz etdirip dağdan kereste çekdirip bana zulm ve te‘addî etmeden hâli <> olmamağın mezbûru istihlâk eylediği sığırın semeni ile benden yed-i ta‘adîsi ve izâle olunması matlûbumdur dedikde gıbbe’s-suâl ve’l-inkâr müdde‘î-yi mezbûr Hasan’dan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin mezbûr el-Hâc Mustafa Beşe müdde‘î-yi mezbûrun sığırlarını gulâmları merkūmân Şahin ve Yusuf’a ahz etdirip istihdâm ve istihlâk etmeyip ve mezbûr zulm ve te‘addî eylemediğine mezbûr el-Hâc Mustafa Beşe’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin müdde‘î-yi mezbûr Hasan bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: İsmail Efendi b. ( ) el-imâm, Musa b. Ahmed, Ali b. Musa, Hüseyin b. Musa, Mehmed Beşe b. Sıyâm, el-Hâc Ali b. Osman, Gazanfer b. Tevekkül, Abdi Çelebi b. Hüseyin, Mustafa Çelebi b. İsa.