İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 388 Hüküm no: 398 Orijinal metin no: [50a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Beşe b. Bâyezid Mudurnu’da serdar iken Hüseyin Beşe b. Mustafa’nın cerîme adı altında haksız yere kendisinden para aldığı iddiasıyla açtığı davanın anlaşma ile sonuçlandığı İbrâ. Dergâh-ı âlî yeniçerilerinin birinci oda ahâlîsinden Hüseyin Beşe b. Mustafa meclis-i şer‘de yedinci bölüğe mahsûs oda ahâlîsinden olup sâbıkā vilâyet-i Anadolu’da Mudurnu kasabasında serdâr olan bâ‘isü hâze’l-kitâb Ramazan Beşe b. Bâyezid mahzarında ikrâr ve takrîr-i kelâm edip târih-i kitâbdan yedi sene mukaddem mezbûr Ramazan Beşe kasaba-i mezbûrede serdâr iken cerîme nâmıyla bi-gayr-ı vech-i şer‘î benim on beş kıt‘a esedî guruşumu ahz etmiş idi deyü merkūm Ramazan Beşe’den da‘vâ ve taleb eylediğimde ol dahi inkâr etdikde beynimizde münâza‘ât-ı kesîre vâki‘ olmuş idi. El-hâletü-hâzihî vesâtet-i muslihîn ile mezbûr Ramazan Beşe benimle da‘vâ-yı mezbûreden dört yüz akçe kıymetli bir sîm nacak üzerine inşâ-i akd-i sulh eyledikde ben dahi sulh-ı mezbûru kabûl ve bedel-i sulh olup zikri mezbûr eden nacağı mezbûr Ramazan Beşe yedinden ahz u kabz edip mâ‘adâ da‘vâsından mezbûrun zimmetini ibrâ-i âmm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâdî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa Beşe b. Hüseyin oda 1, Süleyman Beşe b. el-Hâc Receb, Hasan Bey b. Muharrem, Gazanfer b. Tevekkül.