İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 392 Hüküm no: 405 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Abdullah ile Mehmed b. Ahmed Ağa’nın boşandığı Hul‘ bi’l-vekâle. Mahmiye-i İstanbul’da Kilise Mescidi mahallesinde sâkine Hadîce bt. Abdullah nâm hatun tarafından hul‘-ı âtîyi ikrâra vekîl olup zâtını ma‘rifet-i şer‘iye ile ârifân Ömer Bey b. Müslim ve Osman Beşe b. Mustafa nâm kimesneler <> şehâdetleri ile şer‘an vekâleti sâbite olan Ahmed Bey bin Kemâleddin meclis-i şer‘de zevci hâfızü’l-vesîka Mehmed b. Ahmed Ağa mahzarında bi’l-vekâle ikrâr ve takrîr-i kelâm edip mezbûr Mehmed Ağa <> zevcesi müvekkilem mezbûre Hadîce Hatun ile hüsn-i zindegânesi olmamağla mehr-i mü’ecceli ve nafaka-i iddet-i ma‘lûme ve me’ûnet-i süknâsı için mezbûreye iki bin üç yüz akçe verip hul‘a tâlib oldukda merkūme dahi kabûl eyledikden sonra muhâla‘a-i sahîha ile muhâla‘a eyledikde mezbûr dahi ber-minvâl-i muharrer hul‘u kabûl edip zevciyete ve gayra müte‘allika da‘vâdan mezbûr Mehmed Ağa’yı ibrâ-i âmm ile ibrâ ve ıskāt eyledi dedikde gıbbe’t-tasdîkı’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Süleyman Bey b. Şaban el-cündî, Mehmed Bey b. Ahmed el-cündî, Receb Çelebi b. Abdullah, Hüseyin Efendi el-Burûsî, Mehmed Bey b. İlyas el-cündî, Mustafa Çelebi b. Abdullah el-cündî, Abdi Çelebi b. Hüseyin el-muhzır, Rasûl b. Rıdvan el-muhzır, Veli b. Mahmud el-muhzır.