Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 87 Hüküm no: 70 Orijinal metin no: [11a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hilmi b. Mehmed’in Kaytas b. Abdullah’a borcu olduğu Tüccâr tâifesinden Kaytas b. Abdullah nâm kimesne makām-ı kazâda Hilmi b. Mehmed muvâcehesinde da‘vâ edip zimmetinde her vakıyyesi on beşer akçeye olmak [üzere] üç yüz vakıyye keten bahâsından bin altı yüz akçe hakkım vardır, gıbbe’s-suâl ve akībe’l-inkâr müdde‘î-i mezbûrdan da‘vâsına mutâbık beyyine taleb olundukda udûl-i Müslimînden Receb b. Hüseyin [ve] İbrahim b. Mustafa nâm kimesneler makām-ı kazâda müdde‘î-i mezbûrun merkūm Hilmi zimmetinde yüz vakıyye keten bahâsından bin altı yüz akçe hakkı vardır biz bu husûsa şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde şehâdetleri makbûle olmağın mâ-vaka‘a bi’t-taleb ketb olundu. Tahrîren fi’l-yevmi’t-tâsi‘ ve’l-ışrîn min-Şa‘bâni’l-mu‘azzam sene [1]163. Şuhûdü’l-hâl: Seyyid Mehmed Efendi b. Seyyid Ali Efendi, Mehmed Çelebi el-müezzin, Resül b. Hüseyin, Rıdvan b. Abdullah, Mehmed Beşe b. Abdullah, Mehmed Beşe Çukadâr.