Ahi Çelebi Mahkemesi 1 Numaralı Sicil (H. 1063-1064 / M. 1652-1653) cilt: 49, sayfa: 88 Hüküm no: 71 Orijinal metin no: [11a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefât eden Meryem’in vârisleri arasındaki davaya sulh bedeli karşılığınnda son verildiği Mahmiye-i İstanbul’da Üsküblü Mahallesi’nde sâkin olup bundan akdem müteveffât olan merhûme Meryem’in verâseti zevci Oruç Beşe b. Yusuf Tekfurdağı kasabasında sâkin babası Hasan Beşe b. İsmail ve vâlidesi Hümâ bt. Murad Bey nâm hatuna münhasıra olduğu şer‘an mütehakkık oldukdan sonra merkūmân Hasan Beşe ve Hümâ Hatun taraflarından vech-i âtî üzere sulh ve ibrâya ve bedel-i sulhü ahz u kabz ve kendülere îsâle vekîl olup vekâleti hasm-ı câhid-i şer‘î mahzarında kasaba-i mezbûre ahâlîsinden olup huzûr-ı (...) olan Receb Beşe ve Veli ve Ramazan Beşe b. Musa taraflarından tahammül-i şehâdet eden Osman Beşe b. Hakkı ve Hasan Beşe b. Üveys şehâdetleri ile şer‘an sâbit olan merkūmân Hasan Beşe ve Hümâ Hatun’un oğulları Süleyman Çelebi mahfil-i kazâda işbu bâ‘isü’l-kitâb merkūm Oruç Beşe mahzarında bi’l-vekâle ikrâr ve takrîr-i kelâm edip müteveffât-ı mezbûrenin hâl-i hayâtında ma‘kūdün-aleyh olup merkūm Oruç Beşe zimmetinde mütekarrer olan on iki bin eski akçenin müecceli ve yine müvekkilûn-ı mezbûrânın sulbiye kızı? olup müteveffât-ı mezbûre Meryem’den mukaddem mezbûr Oruç Beşe’nin zevcesi iken müteveffât olan Sultan nâm hatunun dahi on beş bin eski akçe mehr-i müecceli vesâir muhallefâtlarından müvekkiller mezbûrân Hasan Beşe ve Hümâ Hatun’a isâbet eden hisseleri mukābelesinde mezbûr Oruç Beşe’den bi-tarîkı’s-sulh dört bin akçe ahz u kabz edip husûs-ı mezbûra müte‘allik da‘vâ ve mutâlebe ve eymân ve muhâsamadan mezbûr Oruç Beşe’yi ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîk ve’t-taleb mâ-vaka‘a ketb ü sebt olundu. Fi’l-yevmi’s-sâlis min-şehri Ramazani’l-mübârek li-sene selâse ve sittin ve elf. Şuhûdü’l-hâl: Es-Seyyid Mustafa Çelebi b. Nasuh, el-Hâc Mehmed b. el-Hâc Kaya, el-Hâc Osman b. Yusuf, Mustafa Beşe b. Mehmed, Halil Beşe Mehmed, Ali b. Osman, el-Hâc Muharrem Ressâm.