İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 397 Hüküm no: 413 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hasan’ın boşandığı kocası Habib Bey’in küçük kızı için vermesi gereken para için açtığı davanın anlaşma ile sonuçlandığı Sulh [ve] ibrâ. Mahmiye-i İstanbul’da Muhtesib Karagöz mahallesi sâkinelerinden Fâtıma bt. Hasan nâm hatun meclis-i şer‘-i hatîr-i lâzımü’t-tevkīrde zevc-i mutallıkı işbu râfi‘u’l-kitâb Habib Bey b. Halil mahzarında bi-tav‘ihâ ikrâr ve takrîr-i kelâm edip mezbûrun firâşından mütevellide olan işbu hâzıra bi’l-meclis Rukiye sadiye-i sagīre kızım için mahmiye-i mezbûrede bin altmış dokuz senesi Şevvali’l-mükerrem’inin on altıncı gününde Bâb Mahkemesi’nde nâib-i şer‘ olan Mevlânâ Ali Efendi sagīre-i mezbûreye benim talebim ile yevmî yirmi dörder akçe nafaka-bahâ takdîr edip vakt-i zarûrette istidâneye ve lede’z-zafer rücû‘a bana izin vermekle târih-i kitâba gelince dört bin üç yüz yirmi akçe müctemi‘ olup meblağ-ı mezbûrdan merkūm Habib Bey yedinden bin yüz akçesin ahz u kabz edip meblağ-ı bâkī üç bin iki yüz yirmi akçeyi mezbûr Habib Bey’den da‘vâ ve taleb eylediğimde ol dahi ta‘allül etmekle beynimizde münâza‘ât-ı kesîre cereyân etmiş idi. El-hâletü-hâzihî vesâtet-i Müslimîn ile da‘vâ-yı mezbûremden mezbûr Habib Bey benimle bin yedi yüz elli akçe üzerine inşâ-i akd-i sulh etdikde ben dahi sulh-ı mezbûru kabûl ve bedel-i sulh olan meblağ-ı mezbûr bin yedi yüz elli akçeyi mezbûr Habib Bey yedinden ahz u kabz ve kabûl edip meblağ-ı bâkī bin dört yüz yetmiş akçe da‘vâsından mezbûr Habib Bey’in zimmetini ibrâ-i âmm-ı kātı‘u’n-nizâ‘ ile ibrâ ve ıskāt eyledim dedikde gıbbe’t-tasdîk mezbûr Habib Bey’in meclis-i mezbûrda mezkûre Fâtıma mahzarında ikrâr ve takrîr-i kelâm edip ben dahi mezbûre Fâtıma zevc-i âhara tezevvüc etmekle mezbûre hakk-ı hıdâne sâkıt olmuşdur deyü da‘vâ etmiş idim. Ba‘de’l-yevm kızım sagīre-i mezbûreyi bilâ-nafaka ve lâ-kisve infâk ve iksâ edip ben dahi sagīr-i mezbûreyi mezbûrenin yedinden ahz etmeyip mezbûre Fâtıma dahi minvâl-i muharrer üzere olduğunu müte‘ahhide olmuşdur dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Ömer Efendi b. el-Hâc Mehmed, Abdi Bey b. Hacı Sofu, Abdullah b. Mustafa, Osman Beşe b. Ali, Ahmed b. Receb, Hasan Beşe b. Rasûl, Hasan Beşe b. Çukadâr, Mehmed Bey b. ( ) hâs fırından, Bayram Bey b. ( ) hâs fırından ve gayruhum mine’l-huzzâr.