İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 398 Hüküm no: 414 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman Beşe b. Ömer Tozanlı Almus köyünde bulunan evini Osman Beşe b. Davud’a sattığı Mübâya‘a. Vilâyet-i Anadolu’da Tokat kazâsı nevâhîsinden Tozanlı nâhiyesine tâbi‘ Almus nâm karye sükkânından Osman Beşe b. Ömer nâm râcil meclis-i şer‘-i hatîrde işbu râfi‘u’l-kitâb diğer Osman Beşe b. Davud mahzarında ikrâr ve takrîr-i kelâm edip akd-i âtî sudûruna dek silk-i mülkümde olup karye-i mezbûrede vâki‘ bir tarafdan yine mezbûr diğer Osman Beşe mülküne ve bir tarafdan Arzuman nâm Ermeni mülküne ve bir tarafdan Hüseyin Beşe b. Hasan Demirci mülküne ve bir tarafdan tarîk-i âmma müntehî ve mahdûd olup bir bâb tahtânî beyti ve bir ahırı müştemil olan cemî‘ menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr diğer Osman Beşe’ye kırk esedî guruşa bâtten bey‘ edip ol dahi ber-minvâl-i muharrer iştirâ eyledikden sonra semeni olan kırk esedî guruşu tamamen mezbûr diğer Osman Beşe yedinden alıp kabz edip menzil-i mezbûru mahâllinde kabz ve tasarrufa mezbûr Osman Beşe’yi taslît eyledim. Ba‘de’l-yevm mülk-i müşterâsıdır. Keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Osman b. Hızır, Mehmed b. Hasan, Veli Beşe er-râcil, Hasan Beşe er-râcil, Osman Beşe er-râcil, Musa Beşe er-râcil, Abdülkerim Beşe er-râcil.