İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 400 Hüküm no: 419 Orijinal metin no: [52a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paçaçı esnafının alacağı baş ve ayakların kethudaları Hasan Beşe tarafından eşit bir şekilde kendilerine verilmesi için anlaşmaları üzerine hüccet talep etmeleri Hüccet-i paçacıyân. Mahmiye-i İstanbul’da paçacı tâifesinden Yusuf Beşe b. Hüseyin ve el-Hâc Yusuf b. Mustafa ve Mehmed b. Hüseyin ve Oruc Bey b. Hasan ve el-Hâc Mustafa b. Hızır ve Abdi Beşe b. Hasan ve Süleyman b. Hasan ve Hüseyin Beşe b. Abdullah ve Murad Beşe b. Hasan ve Yusuf b. Abdullah nâm kimesneler ve gayrileri bi-ecmâ‘ihim meclis-i şer‘a gelip işbu râfi‘u’l-kitâb kethudâları Hasan Beşe b. Ali nâm kimesne mahzarında her biri takrîr-i kelâm ve bast-ı merâm edip mahmiye-i mezbûrede vâki‘ selhhânelerde zebh olunan koyun ve sığırların baş ve ayakları dükkânlarımıza ale’s-seviye kethudâmız mezbûr Hasan Beşe ma‘rifetiyle tevzî‘ ve taksîm olunup kimesneye ziyâde ve noksan verilmemek için cümlemiz ittifâk eyledik ba‘de’l-yevm ber-minvâl-i muharrer tevzî‘ ve taksîm olunmak üzere yedimize hüccet-i şer‘iye verilsin dediklerinden nazm-ı umûrları için bu vesîka ketb olundu. Fi’l-yevmi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: es-Sâbıkūn.