İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 401 Hüküm no: 421 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sergiz v. Kilmas tarafından Yeniçeri Murad Beşe b. Bali’ye satılan kılıcın kını kokonos kemiğinden değildir iddiasıyla iadesinin kabul edilmediği Yemîn. Yeniçeri tâifesinden Murad Beşe bin Bali nâm kimesne meclis-i şer‘de bâ‘isü’s-sifr Sergiz v. Kilmas nâm Ermeni muvâcehesinde üzerine da‘vâ ve takrîr-i kelâm edip mezbûr Sergis işbu hazır bi’l-meclis kemik kablı kılıcı kokonos kemiğinden masnû‘dur deyü bundan akdem bana on bin akçeye bey‘ ve teslîm edip ben dahi iştirâ ve tesellüm etmiş idim. Hâlâ zikrolunan kılıcın kını kokonos kemiğinden olmamağla reddolunup semeni verdiğim meblağ-ı mezkûr alıverilmek matlûbumdur dedikde gıbbe’s-suâl ve akībe’l-inkâr müdde‘î-yi mezkûrdan müdde‘âsını mübeyyin beyyine taleb olundukda ityân-ı beyyineden izhâr-ı acz edip istihlâf etmeğin zikrolunan kılıcın kını kokonos kemiğinden olmak üzere bey‘ etmediğine mezbûr Sergis’e yemîn teklîf olundukda ol dahi alâ-vefki’l-mesûl yemîn billâhillezî enzele İncîle alâ-İsa aleyhi’s-selâm etmeğin mezbûr Murad Beşe bî-vech mu‘ârazadan men‘ birle mâ-vaka‘a bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Çelebi b. Mahmud, Abdi b. Hüseyin, Mehmed b. Ramazan, Derviş Çelebi b. Hüseyin.