İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 402 Hüküm no: 423 Orijinal metin no: [52b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Manyas Kızılköy’de bulunan yaylak ve yazlakların Şaban b. Veli tarafından tasarruf hakkının sahib-i arz izniyle Yakup Ağa’ya satıldığı Vekâleten bey‘-ı yaylak. Vilâyet-i Anadolu’da Karesi sancağında vâki‘ Manyas kazâsına tâbi‘-i Kızıl nâm karye sükkânından Kara Veli b. Şaban nâm kimesnenin sulbî kebîr oğlu ve tarafından husûs-ı âti’l-beyânı ikrâra vekîl olup yine karye-i mezbûrede sâkin Mehmed b. Ali ve Mirze b. Hızır nâm bevvâb-ı sultanî şehâdetleri ile şer‘an vekâleti sâbite olan Şaban b. Veli nâm kimesne meclis-i şer‘-i hatîrde Kızılmusluk mahallesinde sâkin olup hâlâ sipâhiler kethudâ yeri olan bâ‘is-i hâze’l-kitâb Yakub Ağa b. Hasan tarafından ikrâr-ı âti’z-zikri tasdîka sâbitü’l-vekâle vekîli olan Mustafa Bey b. Ali nâm sadrî mahzarında bi’l-vekâle ikrâr ve takrîr-i kelâm edip karye-i mezbûrede vâki‘ el-Hâc <> Nasuh Kışlası demekle ma‘rûf bir tarafı Çatakderesi ve bir tarafı Ibrıcak makābiri bir tarafı Firakoğlu yeri ve bir tarafı tarîk-i âmma müntehî senede elli akçe mukāta‘a-i kadîmesi olan kışlak ve yazlak ta‘bîr olunan yaylakımı ve yine yaylak-ı mezbûra muttasıl olup Akviran tımarı demekle ma‘rûf mevzi‘de vâki‘ bir tarafı Sağılık alanına ve bir tarafı mîrî koruluğuna bir tarafı Köseler kışlasına ve bir tarafı tarîk-i âmma müntehî senede yirmi akçe mukāta‘ası olan kışlak ve yazlak ta‘bîr olunan yaylakım dahi hakk-ı tasarruflarını ma‘rifet-i sahib-i arz ile müvekkil-i mezbûr Yakub Ağa’ya beş bin akçe bedel mukābelesinde vekâletim hasebiyle ferâğ [54a] ferâğ ve tefvîz ol dahi tefevvüz ve kabûl eyledikden sonra bedel-i mezkûr beş bin akçeyi vekâletim hasebiyle müvekkil-i mezbûr Yakub Ağa yedinden tamamen ahz u kabz edip zikrolunan yaylakları mahâllinde zabt ve tasarrufa mezbûr Yakub Ağa’yı taslît eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Mustafa b. Mehmed el-cündî, el-Hâc Mustafa b. Ahmed el-cündî, Mehmed b. Ahmed el-cündî, Mehmed b. Ahmed el-cündî, Mehmed b. Ali el-cündî, İslâm b. Mehmed el-cündî, Hasan b. Ahmed el-cündî, Mehmed b. Hızır ve gayruhum.