İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 403 Hüküm no: 424 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İnegöl Cevizabad köyünde bulunan Rahime Hatun’a ait evin Mehmed Çavuş’a satıldığı Mübâya‘a. Husûs-ı âti’l-beyânın mahâllinde tahrîri iltimâs olunmağın savb-ı şer‘den Mevlânâ Ahmed Efendi irsâl olunup ol dahi <> Dârü’l-hilâfeti’l-aliyyeti Kostantıniyyeti’l-mahmiyede Çıkrıkçı Kemâl mahallesinde efdalü’l-müderrisîni’l-kirâm Esadzâde Ebussuûd Efendi’nin sâkin olduğu menziline varıp zeyl-i vesîkada isimleri mastûr olan Müslimîn huzûrunda akd-i meclis-i şer‘-i şerîf eyledikde mûmâ-ileyh Ebussuûd Efendi’nin hemşîreleri umdetü’l-muhadderât Rahime Hatun tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân olan mezbûr Ebussuûd Efendi ve Mehmed Efendi b. Şaban şehâdetleri ile şer‘an vekâleti sâbite olan efdal-i efâzilü’l- müderrisîni’l-kirâm Habilzâde Ömer Efendi meclis-i ma‘kūd-ı mezbûrda işbu bâ‘isü’r-rakīm Mehmed Çavuş b. Osman mahzarında bi’l-vekâle ikrâr ve i‘tirâf edip müvekkilem mezbûrenin silk-i mülkünde münselik olup vilâyet-i Anadolu’da Hüdavendiğar sancağında İnegöl kazâsına tâbi‘ Cevizabad nâm karyede vâki‘ inde’l-ahâlî ve’l-cîrân tahdîd ve tavsîfden müstağnî dâhilen ve hâricen büyût-ı adîdeyi ve eşcâr-ı müsmireyi ve gayr-ı müsmireyi hâvî kestane bahçesini müştemil olan cemî‘ menzilimi vekâletim hasebiyle bâtten merkūm Mehmed Çavuş’a yüz yirmi üç bin fıddî akçeye bey‘ edip ol dahi iştirâ ve kabûl eyledikden sonra semen-i mezbûru yedinden bi’t-tamam ahz u kabz edip menzil-i mezbûru mahâllinde zabta taslît eyledim dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘dehû ma‘an irsâl olunan Veli b. Mahmud ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: el-Hâc Mustafa Kethudâ b. Ahmed, Kasım Efendi b. el-Hâc Yusuf, Yusuf b. Hüseyin Sâdık Efendi b. Mehmed, Mustafa b. Şaban, Mehmed Efendi bin Hüseyin el-imâm, Davud Çelebi b. Süleyman, el-Hâc Mustafa Bey? b. Mustafa, Hızır Çelebi b. Abdülkerim, Cevdet b. Mehmed, Mustafa b. Hasan.