İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 404 Hüküm no: 425 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hocapaşa Hobyar mahallesinde bulunan iki parça kilise arsasının Ahmed b. Mehmed tarafından Anadolu Kazaskeri Abdülkadir’e satılması Mülknâme-i Hazret-i Kadri Efendi. Meblağ: 49.000 Husûs-ı âti’l-beyânın mahâllinde tahrîri iltimâs olunmağın bu fakīr Dârü’l-hilâfeti’l-aliyye Kostantıniyyeti’l-mahmiyede Eski İmâret mahallesinde sâkin olup hâlâ sadr-nişîn-i Anadolu olan a‘lemü’l-ulemâ’i’l mütebahhirrîn efdalü’l-fudalâi’l-müteşerri‘în mümeyyiz-i merâtibü’l-âlimîn mübeyyin-i derecâtü’l-kâmilîn lâ zâlet âyât-ı fezâilihi fî-safahâti’l-evrâki’l-mastûre ve mâ berihat râyâti siyâdetihi fî-aktâr-i arz-ı menşûre ağnî bihi Hazret-i Abdülkadir hazretlerinin sâkin oldukları menzillerine varıp zeyl-i rakīmde muharrerü’l-esâmî olan Müslimîn huzûrunda akd-i meclis-i şer‘ olundukda mahmiye-i mezbûrede Kumkapı kurbünde Cerrâhbaşı İshak Bey mahallesinde sâkin el-Hâc Ahmed b. Mehmed meclis-i merkūmda işbu kitâb-ı sıhhat nisâb yed-i mübârekelerine vusûl ile şerefyâb olan müşârün-ileyh efendi huzûrunda ikrâr ve takrîr-i kelâm edip bin yetmiş senesi Zilka‘de’sinin on altıncı gününde vâki‘ harîk-i kebîrden sonra mahmiye-i mezbûrede Hoca Paşa’dan Zeyrek altına gelince Yahûd tâifesi sâkin oldukları emlâki ve taht-ı icârelerinde olan evkāfı ehl-i islâma bey‘ ve tefvîze mukaddemâ müekked fermân-ı âlî sâdır olup mûcebiyle amel olunmağla zikrolunan mahallât Müslimîn mahalleleri olduğu ecilden zikrolunan Hoca Paşa’da Meydâncık kurbünde Hubyar mahallesinde vâki‘ Yahûd tâifesinden Küçük Silsile cemâ‘atine mahsûs olup muhterik olan kilise ki cânib-i kıblîsi tarîk-i âmma ve şarkīsi Haremeyn-i şerîfeyn vakfından tasarrufunda olan arsa-i hâliyeye ve şimâlisi ba‘zan zikri âtî kiliseye ve ba‘zan Bîzebân Ağa tasarrufunda olan mülk arsaya ve garbîsi müşârün-ileyh Bîzebân Ağa tasarrufunda olan mülk arsa ile mahdûd olup etrâf-ı erba‘asında kârgir kâfiri cidârları ve ortasında dahi kezâlik bir duvar-ı cedîd-i mâ’î ve duvar içinde mevzû‘ bir küfegî musluğu ve sâir enkāzı ve zikrolunan Haremeyn-i şerîfeyn vakfı tarafından olan duvarın hâricinde kilise-i mezbûre ile zikri âtî kiliseye mahsûs mülk tarîk ve cânib-i şimâlisinde sâlifü’z-zikr kilise ile zikri âtî kilise beyninde zikrolunan kiliselere mahsûs bir mikdâr arsayı müştemil muhterik kilise yeri ve yine mahalle-i mezbûrede vâki‘ Kalovarta cemâ‘atine mahsûs olup kıblîsi ba‘zan Bostancı tasarrufunda olan menzile ve ba‘zan sâlifü’z-zikr Haremeyn-i şerîfeyn vakfı olan arsaya ve ba‘zan zikri sebkeden kiliseye ve garbîsi ba‘zan sâlifü’z-zikr Bîzebân Ağa mülküne [53b] ve ba‘zan Mesih Paşa vakfı olan arsaya ve ba‘zan Çaşnigir Mustafa Ağa mülküne ve şimâlisi ba‘zan Çaşnigir Mustafa Ağa mülküne ve ba‘zan ( ) tasarrufunda olan kârgir mahzene ve şarken merhûm Üsküdârî Mahmud Efendi vakfı ile mahdûd olup câ-be-câ münhedim kârgir ve kâfirî cidârı ve enkāzı merhûm-ı mezbûr Mahmud Efendi vakfı tarafında vâki‘ kilise-i mezbûreye mahsûs bir mikdâr arsayı <> ve içinde bir su kuyusunu ve zikri sebkeden merhûm-ı mezbûr Mahmud Efendi vakfı ile kilise-i mezbûreye mahsûs tarîk-i hâssa müştemil olan muhterik kilise arsalarının mâliki ve bânîsi ma‘lûm olmamağla cânib-i mîrîye â’id olmağın mukaddemâ arsateyn-i mezbûreteyn cânib-i mîrîden bey‘ olundukda ben dahi ba‘de’l-müzâyedeti’l-mu‘teber ve inkıtâ‘ı’r-rağbe otuz bin akçeye iştirâ ve semeni olan meblağ-ı mezbûru işbu hazır bi’l-meclis Beytü’l-mâl Nâzırı Çukadâr Ahmed Ağa b. Hüseyin yediyle teslîm-i hazîne-i âmire eyleyip mevkūfâtdan yedime temessük verilip akd-i âtî sudûruna dek silk-i mülkümde münselik mülküm idi. Hâlâ zikirleri mürûr eden iki kıt‘a kilise arsalarını bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık müşârün-ileyh efendi hazretlerine bi-safkatin vâhidetin kırk dokuz bin akçeye bey‘-ı bâtt ile bey‘ ve teslîm onlar dahi minvâl-i muharrer üzere iştirâ ve tesellüm ve kabûl eylediklerinden sonra semeni olan meblağ-ı mezbûru tamamen yedlerinden alıp kasr-ı yed eyledim. Ba‘de’l-yevm zikirleri sebkeden iki kıt‘a kilise arsalarımı bi-cümleti’l-hukūk müşârün-ileyh efendi hazretlerinin mülk-i müşterâsıdır keyfe mâ yeşâ mutasarrıf olsunlar dedikde ol ki vâki‘ hâldir bi’t-taleb ketb olundu. Tahrîren fi’l-yevmi’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Efdalü’l-müderrisîn Feyzullah Efendi eş-şehîr bi-Osmanzâde, Fahrü’l-müderrisîn Abdullah Efendi b. Mustafa, fahrü’l-kuzât Seyyid Mehmed Efendi eş-şehîr bi-defterdâr-ı emîrî, fahrü’l-müderrisîn Ömer Efendi ve gayruhum.