İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 406 Hüküm no: 426 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Beşe bin Mehmed’in küçük kızı Ayşe’nin ihtiyaçları için Keşap Vanazıt köyünde bulunan bağın Ömer Beşe’ye satıldığı Mübâya‘a. Medîne-i Galata’ya tâbi‘ kasaba-i Beşiktaş’da Azeb İskelesi mahallesinde sâkin iken bundan akdem vefât eden Hasan Beşe b. Mehmed’in verâseti zevce-i metrûkesi Fâtıma bt. Ali ile sulbiye sagīre kızı Âişe’ye münhasıra olduğu şer‘an zâhir ve müte‘ayyin oldukdan sonra mezbûre Fâtıma tarafından husûs-ı câ’i’z-zikri ikrâra vekîl olup mezbûrenin zâtını ma‘rifet-i şer‘iye ile ârifân el-Hâc Hüseyin bin Osman ve Osman bin Mirza şehâdetleri ile şer‘an vekâleti sâbite olan Mustafa Çelebi b. Ali vekâleten <> ve sagīre-i mezbûrenin kıbel-i şer‘den mansûb vasîsi olmağla vesâyeten meclis-i şer‘de işbu sahibü’l-kitâb Ömer Beşe b. Veli mahzarında bi’l-vekâle ve bi’l-vesâye ikrâr ve takrîr-i kelâm edip müteveffâ-yı mezbûrun Trabzon sancağında Keşab kazâsına tâbi‘ Vanazıt nâm karyede vâki‘ bir tarafdan Derzi Mustafa nâm kimesne mülküne ve bir tarafdan İbrahim Efendi mülküne ve bir tarafdan Kabakos nâm kimesne mülküne ve taraf-ı râbi‘i tarîk-i âm ile mahdûd ve müntehî eşcâr-ı müsmire ve gayr-ı müsmireyi müştemil ve bir mikdâr orman yerini hâvî mülk bahçe ile’l-vefât müteveffâ-yı mezbûrun taht-ı tasarrufunda olup ba‘de vefâtihî sekiz sehm i‘tibâr olunur sihâm-ı mezbûrenin bir sehmi mezbûre Fâtıma’ya ve yedi sehmi sagīre-i mezbûre Âişe’ye isâbet ve intikāl <> eylemiş idi. El-hâletü-hâzihî müteveffâ-yı mezbûrun düyûn-ı kesîr-i müsbetesi olup menkūl kısmından düyûnuna vefâ eden terekesi olmadığından gayrı sagīre-i mezbûre nafaka ve kisveye eşedd-i ihtiyâc ile muhtâc olmağla mukadde[mâ] bahçe-i mahdûde-i mezbûre sûk-ı sultanîde ba‘de’l-müzâyede ve inkıtâ‘ı’r-rağbe mezbûr Ömer Beşe üzerinde üç bin yüz elli akçeye karâr edip ziyâde ile tâlib-i âhar zuhûr etmemeğin bahçe-i mezbûreyi zarûret-i deyn ve nafaka için semen-i misli olan meblağ-ı mezkûr üç bin yüz elli akçeye vekâlet ve vesâyetim hasebiyle mezbûr Ömer Beşe’ye bey‘ ol dahi ber-vech-i meşrûh iştirâ ve kabûl eyledikden sonra meblağ-ı mezkûru yedinden tamamen alıp kabz edip bahçe-i mezbûru mahâllinde kabz ve tasarrufa mezbûr Ömer Beşe’yi taslît eyledim ba‘de’l-yevm bahçe-i mezkûre mülk-i müşterâsı olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: İsmail Efendi el-imâm, el-Hâc Ali b. Yahya, Osman b. Emîrza, Mehmed Beşe b. Sıyâm, Hüseyin b. Musa, Ali b. Musa, Musa b. Ahmed, el-Hâc Ahmed b. Mahmud, Abdi b. Hüseyin.