İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 407 Hüküm no: 427 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Çelebi b. Ebîbekir’in Barla’da bulunan iki bağını Ali Çavuş b. Ahmed’e sattığı Mübâya‘a. Medîne-i Galata tevâbi‘inden İstinye nâm kasabaya tâbi‘ Yeniköy nâm karyede sâkin Ahmed Çelebi b. Ebîbekir meclis-i şer‘de işbu bâ‘isü’l-vesîka Ali Çavuş b. Ahmed mahzarında ikrâr ve takrîr-i kelâm edip vilâyet-i Anadolu’da Hamid sancağında Barla nâm kasabada Derbend nâm mevzi‘de vâki‘ bir tarafdan Abdülkerim Ağa bağına ve bir tarafdan Yavaşoğlu bağına ve bir tarafdan Yavaşcazâde bağına ve bir tarafdan ba‘zan Ali Çavuş tarlasını ve ba‘zan merkūm Abdülkerim Ağa bağı ve ba‘zan tarîk-i hâs ile müntehî olup Göğez oğlu ve Yavaşoğlu bahçesi demekle ma‘rûf tahmînen altı ırgādlık iki kıt‘a mülk bağımı safka-i vâhide ile tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Ali Çavuş’a üç bin nakd-i râyic fi’l-vakt akçeye bey‘ edip ol dahi ber-minvâl-i muharrer iştirâ ve kabûl eyledikden sonra semeni olan meblağ-ı mezbûr üç bin akçeyi tamamen yedinden alıp kabz edip zikrolunan iki kıt‘a bağı mahâllinde kabz ve tasarrufa mezbûr Ali Çavuş’u taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Ramazani’l-mübârek li-sene isneyn ve seb‘în ve elf. Şuhûdü’l-hâl: Hüseyin Beşe b. Mahmud, Seyyid Cafer b. Pir Mehmed, Yazıcı Ahmed b. Mehmed, Hüseyin b. Hasan, Eyüb Beşe b. Ömer, İbrahim b. Abdülkerim, İsmail b. Osman, Abdurrahim Efendi.