İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 407 Hüküm no: 428 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed ve Ali isimli çoçukların ihtiyaçları için vasîleri Mehmed b. Abdülkadir’e halaları Emine tarafında açılan dava sonucu nafaka paralarının artırıldığı Kisve için ikişer akçe ta‘yîn. Mahmiye-i İstanbul’da el-Hâc Hamza mahallesi sükkânından Mehmed ve Ali ibney Mustafa nâm sagīrlerin ammiyeleri Emine bt. Receb nâm hatun meclis-i şer‘de sagīrân-ı merkūmânın tesviye-i umûrlarına kıbel-i şer‘den mansûb vâsîleri olan işbu râfi‘u’l-kitâb el-Hâc Mehmed b. Abdülkadir mahzarında üzerine da‘vâ ve takrîr-i kelâm edip vasîyy-i mezbûr sagīrân-ı mezbûrânın ancak nafakaları için onar akçe takdîr etdirmekle sagīrân-ı mezbûrânın tesviyelerine ve sâir havâic-i lâzımelerine zikrolunan onar akçe kifâyet etmemeğin sagīrân-ı mezbûrânın kisveleri için her birine ikişer akçe dahi <>zamm <> olunmak murâdımdır dedikde fi’l-hakīka sagīrân-ı mezbûrânın nafakaları için takdîr olunan onar akçe nafakalarına kifâyet edip kisveleri için dahi bir mikdâr akçe dahi zam olunması lâzım olduğu zeyl-i kitâbda esâmîleri mastûr Müslimîn ihbârları ile mütehakkık ve zâhir ve mütekarrir olmağla hâkim-i muvakkı‘i sadr-ı kitâb tûbâ-lehû ve hüsnü-meâb hazretleri dahi kisveleri için her birinin nafakaları olan onar akçeye ikişer akçe dahi zam olunup mâ hüve’l-vâki‘ bi’t-taleb ketb olundu. Fi’l-yevmi’l-işrîn min-şehri Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Efendi b. ( ) el-imâm, Mahmud Efendi b. Mehmed Ağa, Mustafa b. Bayram, Hasan b. Ramazan, Ali Çelebi b. Mehmed, Rasûl b. Rıdvan.